R Lalzirliana'n Rúlchâwm a tlawh

Ṭawi bialtu MLA R Lalzirliana, minister chuan October 3, Inrinni khan a bial chhung, Rúlchàwm khuaa October 2-a leimin vanga in chhiatna hmun a tlawh a, in leh lo chán chhungkaw pasarihte hnenah ṭanpuina Rs. 20,000 ṭheuh a hlân.

Rulchawm VC House inkawmnaah R Lalzirliana chuan, leimin vanga in leh lo chánte chu a tawrhpui thu sawiin, "A ṭul angin sorkarin hma a la chhunzawm dawn. He vanduaina karah hian Mizo nun mawi - tlawmngaihna leh induhsak tawnna a lang a, a hmuhnawm hle. Rulchawm khaw mite chhiat tawhnaah hian Zo nun mawi chu Mizo khawtlang nunah la vawn nun reng a nihzia a takin a hmuh theih a ni," a ti.

Tun dinhmunah leimin chhan chiang faka sawi theih a la nih loh thu sawiin R Lalzirliana chuan, "Leimin chhan hi zir chian thuai a ni ang. A dan leh a nghawng theihte chiang zawka la zir chian a ni dawn," a ti a, sorkarin mithiamte tírin hmalak zel dan turah ruahmanna an siam tur thu a sawi.

R Lalzirliana chuan, leimin vanga kawngpui bal siamṭhat a nih theih nan PWD hotute biain, kawng siamṭhat a nih hmaa inkalpawhna lailâwk siamna atan Rs. 5,00,000 a ruahman nghal bawk.

Minister hi Saitual SP PC Lalduhthlanga, additional DC Margaret Lalrinawmi Fanai leh Phullen BDO K Lalrinawma ten an ṭawiawm a ni.