Council of Minister an ṭhu khawm: Zo hnahthlakte biometric enrolment tih an duh lo; Sikul 232 dinhmun sang zawka hlankai an rem ti

Nimin khan Council of Minister chu chief minister Zoramthanga hoin Cabinet meeting room-ah an ṭhu khawm a, Myanmar aṭanga rawn raltlan Zo hnahthlakte biome­tric enrolment ti lo tura Ministry of Home Affairs (MHA) a ngen an rel a; sikul 232 dinhmun sang zawka hlankai an rem ti.

Council of Minister ṭhut­khawm zawhah Education minister Lalchhandama Ralte leh IPR minister Lalruatkima chuan CMO conference hall-ah thuthar thehdarhtute kawmin, an thurelte an sawifiah.

Lalruatkima chuan, Myanmar aṭanga Zo hnahthlak rawn raltlante chu Mizoram sorkar, NGO leh mipuite'n theihtawp chhuaha an lo dawnsawn thu sawiin, "Sorkar laipuiin refugee status a pek theih loh avangin chhawmdawlna pawh an rawn pe lo. An ei leh in turahte kan lo chhawmdawl char char a ni. Central-in remti lo mah se, ramin ri a nei a, hnam chuan ri a nei lo tih hi kan sorkar pawm dan a ni," a ti.

Duat taka Zo hnahthlak raltlante enkawl an nih lai hian MHA chuan Zo hnahthlak raltlante hi biometric enrolment ti tura Mizoram sorkar a rawn hriattir thu sawiin, "Hei hi Council of Minister ṭhukhawm chuan ṭha kan ti loa, an rama thawn haw-na remchang turah kan ngai a ni. Chuvangin, kan duh loh thu MHA-ah thlen turin kan rel," a ti a, Zo hnahthlakte rambuaia harsatna tâwk tura thawn kir an remtih loh thu a sawi.

Education minister Lal­chhandama Ralte chuan, dinhmun sang zawka sikulte dah an nih chungchang sawiin, "Adhoc-grant-in-aid a awm mek sikul 180-te chu sorkar sikula dah (provincialised) rem tih a ni. Hei hi October 1, 2023 aṭanga kalpui tur a ni a, kum hnih chhung probation angin an awm ang a, kum 2025 aṭangin sorkar sikul tak tak an ni ve tawh dawn. Hemi tur hian criteria atan an din kum kan dah pawimawh hle," a ti.

Education Minister sawi danin, sikul 180 an provincialised zinga 12 chu higher secondary school a ni a, 120 chu high school niin, 48 chu middle school an ni.

Lumpsum-grant-in-aid a awm mekte pawh an dinhmun tur an siam thu sawiin Education Minister chuan, "Adhoc-grant-in-aid leh lumpsum-grant-in-aid inkara awm turin provisional adhoc GIA kan siam a, chu'ngah chuan HSS 34, high school 11 leh middle school pasarih an ni. Tun sorkar kum atana an sum dawn tur kan pek vek tawh avangin, sorkar kumthar aṭangin provisional adhoc-ah an awm ang," a ti.

Zawhna chhangin Lalchhan­dama Ralte chuan sikulte dinhmun sang zawka hlankai tur chungchangah Finance depart­ment lam nen uluk taka chhût a nih thu sawiin, "Adhoc-grant-in-aid aṭanga provincialised-ah chuan hlawh atan phei chuan sèn belh tur a awm loa, an ngheh tawh dawn avangin GPF-ahte an dah ang a, thla tina pek chhuah a tlem zawk dawn," a ti a, a ngheta thawkte angin hamṭhatna an nei ve tawh dawn thung tih a sawi.

Council of Minister chuan sikul 232-te dinhmun sang zawka hlankai a remtih bakah lumpsum-grant-in-aid ni mekte chu category chi thumah ṭhenin, sorkarin chhawmdawlna a pek ṭhin tihsan a remti bawk.

Council of Minister-in an pawm dangte

▶ Proposal for Amendment of rule 54 of the Mizoram Motors Vehicle Rules, 1995 relating to registration of motor vehicles.

▶ Proposal to rename Social Welfare & Tribal Affairs Department into Social Welfare, Tribal Affairs, Women & Child Development.

▶ The Mizoram Water Resources (Management & Regulation) Bill, 2023.

▶ Proposal for Amendment of the Mizoram Public Record Act, 2011.

▶ Proposal for repeal of the Mizoram Exhibition of Films on Television Screen (Through Cassette Players) Act, 1990.

▶ Proposal for Consideration of the Mizoram Journalists’ Pension Scheme, 2023.

▶ One time relaxation for regularisation of contract & PE employeee outside the prescribed qouta chu sawiho a ni a, a thuphungin an pawm.