Reiek khua: Best Tourism Village

New Delhi-a Bharat Mandapam-ah nimin khan World Tourism Day hman a ni a; he hunah hian Reiek khua chu India rama tourism village ṭha ber - 'Best Tourism Village of India 2023' atan puan niin, Tourism minister Rober Romawia Royte chuan Union Tourism secretary V Vidyavathi hnen aṭangin Reiek khua aiawhin gold award a dawng.

Best Tourism Village hi Ministry of Tourism hnuaia Central Nodal Agency for Rural Tourism buatsaih a ni a, Best Tourism Village thlannaah hian India rama district hrang hrang 315 leh state 31 aṭangin dilna 750 chuang a lut a ni. Best Tourism Village competition hi February 16, 2023 khan Ministry of Tourism chuan a hawng a, online portal-ah dilna thehluh niin, September thla tir khan khaw ṭha zual 80 thlan a ni a, heng thlanchhuah khuate hi National Evaluation Committee hmaah power point presentation pek a nih bakah, video clip thehluh a ni bawk.

Award dawng thei tur hian tehna (evaluation parameters) hrang hrang Sustainable Development Goal-te nena inzawm thil pakua hman a ni. A ti ṭha zual khaw 35 thlan chhuah hnenah Gold, Silver leh Bronze award pek a ni a; a sang ber panga zingah Reiek khua chu telin, Gold Award a dawng a ni.

Tourism Minister hi Mizoram Tourism joint secretary V Lalengmawia leh Reiek VCP Lalrozama ten an ṭawiawm.