Kan Bible min zirtir dan leh kan ram rorelna kalphung a inmil lo - Duhoma
ZPM Suangpuilawn Unit chuan September 26, Thawhlehni zan khan an khaw community hall-ah vantlang inkhawm an buatsaih a, he hun hmanpuitu ZPM leader Lalduhoma chuan, Bible zirtir dan leh Mizoram rorelna kalphung a inmil loh thu a sawi.
Lalduhoma chuan, MNF leh BJP an thawk dun tlat chu thilmak a nih thu sawiin, "Kan Bible zirtir dan leh Mizoram rorelna kalphung hi inmil lo tak a ni. Manipur buaina vanga Lok Sabha-a no confident motion-ah pawh khan MNF sorkar chu huai taka au chhuak angin lang mah se, Parliament-ah a duh lo tute lam an chhuah vek laiin kan MP chu chhuak ve lote zingah a ṭang, thil mak a ni. MNF hi BJP thawhpui tlattu an ni tih hi mipuite hian kan hriat a ngai," a ti.
ZPM Leader chuan Congress party pawh tun hnaia Chakma area inthlanah BJP-te nen an thawhho thu sawiin, "Congress hruaitu lu Rahul Gandhi-a ngei pawhin Hindu party kan ni tiin a au chhuak hial a ni. Kan sakhua a lo him theih nan mipui ten ngaihtuahna kan sèn a ngai," a ti a, ZPM party chiah central party zawm ve lo, an thu thu a awm ve lo tur leh thutlukna mahnia siam thei tur an nih thu a sawi.
Vawiina sorkar ding lai chu MNF party-te an nih thu sawiin ZPM Leader chuan, "ZPM chu opposition party lian ber kan ni mek. Mizoramah mipuiin sorkar lai an nin tawh reng rengin opposition party lian ber chu sorkar lai thlaktuah kan hmang ṭhin. Chuvangin ZPM te chu 2023 MLA election-ah Pathian leh mipui zarah sorkarna kan chan ngei a rinawm ta hle a, party pawh sorkarna chang turin a inbuatsaih fel ta hle a ni," a ti.