Congress Mahila-in inkhawmpui an hmang; Hmeichhiate'n danglamna an thlen thei - Lalsawta

Mizoram Pradesh Mahila Congress Committee chuan nimin khan Vanapa Hall-ah khawmpui an hmang a, an hun hmanpuitu MPCC president Lalsawta chuan hmeichhiate'n a ṭha lamah danglamna tam tak an thlen theih thu a sawi.

MPCC President chuan, hmeichhiate hian thil ṭha tam tak dang­lamna an thlen thei tih sawiin, "Vawiinah hian Mahila-ten dang­lamna an siam mek a ni. Hmeichhiate hian kan ram, kan hnam, kan sakhua chhanhim turin nasa zawka ṭan lak a ngai. India ram Independence kum 1947 aṭanga vawiin kum 76 chhung hian India ram mipui tana hun khirh leh kan hma lam thim ber hun kan thleng mek," a ti.

Inlungrualnate, mahni hnam leh sakhua ṭheuhah lungmuang leh nuam ti taka awm ṭhinna chu nuai chhiat a nia sawiin Lalsawta chuan, "Mahni rama mikhual dinhmun pawh tluk loa awm thei kan ni mek. Muslim chu Pakistan-ah, Hindu chu India-ah tih ngaihdan tuai thar a ni," a ti a, BJP chuan India ram chu Hindu ram (Hindu Rashtra) a siam tumin ke an pen mek thu a sawi.

Lalsawta chuan BJP thil tum hlawhtling ta se Mizo (tribal) te hi social strata-ah khawiah nge an awm ang tia zawhna siamin, "Hei hi mipui chakna leh vote hmangin kan ti danglam thei a, kan thlak danglam dawn," a ti.

Mahila president Vanlalawmpuii Chawngthu pawhin thu sawiin, "Hmeichhiate hi a ṭha zawnga danglamna siamtu kan ni thei. Pathianin min chhandam tura Lal Isua a rawn tirhna kal kawng chu hmeichhia, Mari a ni. India Prime Minister hmingthang zinga lar tak chu hmei­chhia Indira Gandhi a ni," a ti a, tuna India ram politician, hnam hnuaihnung leh sakhaw tlem zawkte humhalhtu Congress party hruaitu pawimawh chu Sonia Gandhi niin a sawi.

Vanlalawmpuii Chawngthu chuan Mizoram hian ṭawngkam thiam, thusawi thiam leh mi thawm na tak tak an mamawh lo tih sawiin, "Ram hruaitu turin an ṭha lem lo - Cuban president Fidel Castro te, Uganda president Idi Amin, Zimbawe president Robert Mugabe, Adolf Hitler-te leh Iraq president Saddam Hussein te pawh an thawm a na a, an chakin mipui rilru hneh leh thunun taka thusawi pawh an thiam hle. Mahse an hun chhungin ram mipui tawrhna nasa takin a thleng," a ti.

Inkhawmpuia an resolution pass-te

■ Hmeichhiate'n ram rorelna kalpuina kawngah thûk zawka thuneihna an chan theih nana Parliament-in Women's Reservation Bill, Lok Sabha leh State Legislative Assembly-a hmeichhiate tana seat 33% hauhsakna tur a pawm fel ta chu lawmawm kan ti. Hmeichhiate tana quota a awm theih nan hian Congress party chu a sulsutu ber a nih reng avangin lawmawm kan ti a ni.

■ 128th Constitutional Amendment Bill, 2023 (women's reservation) tuna kalpui nghal loa BJP-te'n delimitation exercise leh census neih fel hnua kalpui chauh tura an ti erawh hmeichhiate hmakhua ngaih tak tak lohnaah kan ngai a, kan dem hle a ni.

■ MPCC election manifesto Ṭang Puihna hi din chhuah tum tak taka ṭang, ṭhalai, kut hnathawkte, ṭan ngaihna hre tawh lo khawpa dinhmun tleu tawhte leh kawng hrang hranga eizawngtute tan ṭha kan ti tâwk a ni.

■ MPCC president Lalsawta kaihhruaina hi kan ring tâwk. A kaihhruaina hnuaiah sorkar ṭha leh thianghlim, Zoram mipui mamawh kan siam ngei ang.

■ Mizorama party hrang zingah kan ram, kan hnam leh sakhua a him theih nan, Congress party-lo chu party dang an awm loh avangin Lalsawta kaihhruai Congress party hi kan ring tawk a ni.