Mizo zirlaite tan thawhhona thuthlung ziak

Governor Dr Hari Babu Kambhampati leh Assam Rifles inspector general (East) Maj. Gen. Vinod Kumar Nambiar uapna hnuaiah 23 Sector Assam Rifles, National Integrity & Educational Development Organisation (NIEDO) leh Axis Bank chuan nimin khan Lammualah thawhhona thuthlung (memorandum of understanding) an ziak a; an thawhhona tur hi 'Project Sentinel – Centre of Educational Excellence, Skilling and Wellness' tih a ni.

Project Sentinel – Centre of Educational Excellence, Skilling and Wellness hmang hian Mizorama zirlaite'n zirna ṭha zawk leh state dang zirna-in ṭha zawka lehkha an zir theihna atan hmalak a ni dawn a; project hnuaiah hian hmeichhe naupang leh mipa naupang 30 thlan chhuah tur niin, thla 12 chhung atan engineering leh medical entrance exam hrang hrang bakah, competitive entrance exam-ah allied stream telin kaihhruaina uluk takin pek an ni dawn a ni.

Bulṭannaah chuan science stream hmanga class 12 pass tawh, JEE leh NEET atana inbuatsaih mekte chu ngaih pawimawh hmasak an ni ang a. Hemi hnuah stream dangte pawh kalpui chhoh zel tura ruahman a ni. Thla 12 chhung hian competitive exam huangah mithiamte ruaiin Assam Rifles Complex, Zokhawsangah kalpui tur a ni.

Governor Dr Hari Babu Kambhampati chuan, Axis Bank leh NIEDO-te’n Assam Rifles ṭhahnem ngaihna ṭawmpuia Mizo ṭhalaite hmakhua ti êng tura an rawn pen chhuak chu lawmawm a tih thu a sawi a, "Project Sentinel hian Mizo zirlai, thluak ṭha tak takte chu sang leh zualah a vawrh dawn a, kan zirlaiten tun aṭanga kum hnih a lo ral chuan hlawhtlinna lian tham tak tak an rawn nei nual dawn a ni," a ti.

Chhungkaw sum dinhmunin a zir loh avanga an thlen tur thleng thei lo zirlai an awm ṭhin tih sawiin Governor chuan, "Project Sentinel hnuaiah hian heng zirlai chhawmdawl ngaite tan hian remchanna duhawm tak a lo in her chhuak dawn a. Vawiina he thawhhona hi Mizoram tana zirna huanga Mellung pawimawh tak a ni." a ti bawk.

He program hnuaiah hian zirlaite chu soft skills, personality development, critical life competencies, leadership capabilities, personal conditioning, wellness programs, vocational training leh a dangte zirtir a ni dawn a; zirlaite thlan dan turah NIEDO hotute chuan Mizoram hmun hrang hranga sikul an tlawh chhuak vek dawn a ni.

Thawhhona thuthlungah hian Assam Rifles aiawhin DIG Brig. Girish Upadhya-a'n hming a ziak a, AXIS Bank aiawhin senior vice president Abhejit Agarwal leh NIEDO aiawhin chairman Dr Rohit Srivastava ten hming an ziak bawk.