Mizoram politics siamṭhat duh an pung zel - Lalduhoma

ZPM Legislature Party (ZLP) leader Lalduhoma chuan, ZPM chu Mizoram politics-a Pathian ram thlentir tumtu an nih thu leh, Mizoram hun tawn mek avangin Mizoram politics siamṭhat duh an pung zel niin a sawi.

October 3, Inrinnia Sumsuih khuaa ZPM VC thar lawmna leh mi thar lawm luh inkhawmah thu sawiin Lalduhoma chuan, "Mizoram politics-ah insiamṭhatna (reformation) a thleng mek a, VC member tharte leh vawiina ZPM zawm tharte hi a chhe lai siamṭhatu ni turin ka ngen che u a ni," a ti.

Lalduhoma chuan, "MLA aṭanga min bàn tumna chungchangah mi tam takin lungawi lohna lantir a, buaina a chhuah hlaute an lo awm a, hei hi kalphung thar zia a ni lo a, politics-a Pathian ram thlentir tum kan nih avangin Pathian hnenah ṭawngṭai rualin hun kan hmang zawk a ni," a ti a; ZPM office bearer-te leh ṭhalai hruaitute'n an inah ṭawngṭaiin Pathian kutah an hlan a, an chungah a lawm thu a sawi.

ZLP Leader chuan, Mizoram politics kalphung siamṭhat a ṭul tawhzia sawiin, "Siamṭhat tum ṭhalai rual an pung zel. Thil ṭha lo nia kan ngaih, rilru natna min thlentute hi Mizoram politics siamṭhatna hmanrua a ni daih thei," a ti.

Mizoram ṭhalaite an harh chhuak mek nia sawiin Lalduhoma chuan, "Kan hun tawn mek avang hian Mizoram politics siamṭhat duh an pung zel a, kalphung ṭha, a ngaihna hria leh hna thawk thei sorkar siam duhna leh tumna tun hnaiah a nasa ta hle. Hmun hrang hrangah ZPM zawm thar lawm luh tur an awm ta reng a ni," a ti a; zin theih a nih hunah khaw tin fanga an la zin chhuah dawn thu a sawi.

ZPM thuchhuah chuan, Sumsuihah hian an party zawm thar mi 81 an lawm lut niin a tarlang.