Journalist pension scheme sawifiah

Nimina chief minister Zoramthanga hoa Council of Minister ṭhut­khawmnaah IPR minister Lalruatkima chuan The Mizoram Journalists’ Pension Scheme, 2023 chung­chang a sawifiah. He scheme hi Council of Minister chuan a pawm.

Lalruatkima chuan MJA-in an dilna chu kum 5 aia a tam tawh thu sawiin, "Ṭhenawm state Assam, Tripura leh Manipur-ahte hetiang hamṭhatna hi chanchinbu­mite hnenah pek a ni mek a, India state dang tam takte pawhin hetiang hi an nei ve. Assam leh Tripura chuan thla tin Rs. 10,000 an pe mek. Khawtlang leh ram leh hnam tana MJA-in 2019 leh 2021-ahte sorkarah chan­chinbumite tan a hminga pension ang, ṭanpuina pek theih dan ruahmanna an duante an lo thehlut tawh," a ti.

IPR Minister chuan MJA ruahmannate hi sorkar din Study Team-ten zirchiangin, rawtnate an siam thu sawiin, "Ṭum eng emaw zat sawiho a nih hnuin tunhnai khan a scheme ruangam chu peihfel a lo ni ta," a ti a, meeting-a sawiho tura chhawp chhuah a nih tâk thu a sawi.

Lalruatkima sawi danin, he scheme duan chhin ang chuan chanchinbumi, MJA member ni bawk kum 60 tling tawh leh chanchinbu leh thuthar thehdarhna kawnga chhum lo chat loa kum 30 lo thawkte'n he hamṭhatna hi an dil thei dawn a, thla tin Rs 8,500 pension ang ṭanpuina sum an dawng ang.

Family pension angin chhawm emaw, a latu in a boralin an nupui fanau ten an la thei dawn lo. Kum 60 an tlin hmaa natna khirh - cancer, lung zai leh taksa peng ṭhen­khat thlak (organ trans­plantation) an tawh palhin he hamṭhatna hi dawn an dil thei thung.

He hamṭhatna latute hian pension dang eng chi mah an la thei dawn lo. Chu bakah, an hna hi an chawlh ngei ngei a ngai dawn a, chanchinbumi anga hamṭhatna dang an dawn mekte pawh an dawng zui thei dawn lo a ni.

MJA member ni mek mi 187 bawr aṭangin he hamṭhatna dawng thei mi 23 bawr vel awm mah se, an hna aṭanga chawlhsan a ngaih avangin leh chanchinbu mi anga ham­ṭhatna dang an dawn mekte a tawp vek dawn avangin a takah chuan mi 4/5 bakin he hamṭhatna hi an dil a rinawm loh.