World Tourism Day hman a ni

Nimin kha World Tourism Day a ni a, Tourism department buatsaihin Aijal Club-ah Tourism Development Board vice chairman TC Pachhunga hoin hman a ni. Kumina World Tourism Day thupui chu 'Tourism & Green Investments' tih a ni.

He hun hi Tourism director Saitluanga'n a kaihruai a; Tourism secretary Dr Lalrozama'n Mission LiFE, Ministry of Tourism leh United Nations World Tourism Organisation & United Nations Environment Program ṭangkawp hnuaia kalpui tur 'Travel for LiFE (Lifestyle for Environment) Program' a hawng. Tourism deputy director Rachel Lalrinhlui kaihruaiin Responsible Travel thutiam leh Tourist officer C Ramsangzuali kaihhruaiin Travel for LiFE thutiam sawirual a ni.

TC Pachhunga chuan, India rama a lawmna pui ber New Delhi-ah Reiek khuain Best Tourism Village of India 2023 a dawng chu chhuanawm a tih thu a sawi a, "Hei hian tourism chawisan kawngah a taka ke pen zel a nih zia a tarlang. Mizoram Responsible Tourism Policy chuan tourism chawisan kawngah hmasawnna a thlen a, khawvel hriata kan ram mawina leh nawmna te, hnam ziarang leh nunphungte phochhuaktu nih tum ṭheuh ang u," a ti a, Mizoramah tourist guide mi 89-te ṭha taka zirtirna peka chher chhuah an nih thu a sawi.

Mizoramah Travel Agent leh Tour Operator eng emaw zat an awm thu sawiin TC Pachhunga chuan, "Awmze nei zawka khualhip, dawnsawn leh sum leh pai dehchhuah kawnga ngaihtuahna sèn a ni a. Tourism chu a ṭha leh dik zawnga kalpui chuan sum leh pai dinhmun siamṭhat theihna, mirethei thlenga thlengpha leh eizawnna ngelnghet siam theitu a ni," a ti a; zirna-in hrang hrang ah Yuva Club din a nih thu a sawi bawk.

World Tourism Day hi United Nations World Tourism Organisation (UNWTO) ruahmannain thupui thlan bik neiin kum 1980 aṭanga hman ṭan a ni a, kumin hi a vawi 43-na a ni.

He hunah hian Tourism Excellence Award 2023 leh Swachhata Pakwada result puan a ni a, lawmman sem nghal a ni.