Lawngtlai district kum 25-na lawm a ni

Lawngtlai DC pisa tualah nimin khan Lawngtlai district kum 25-na, Silver Jubilee lawm a ni a; Lawngtlai East bialtu MLA H Biakzauva leh Lawngtlai West bialtu MLA C Ngunlianchunga ten an hmanpui.

H Biakzauva chuan, Lawngtlai district-in kum 25 a chuànkài theih nana district dinhmun hmu tura mi ṭhahnemngai leh inpete inpekna leh ṭhahnemngaihnate hlut sak a ṭul thu sawiin, "Sorkar hmalakna inkhairual a awm theih nan Lawngtlai district chhunga khaw ṭhenkhat, kalpawh har deuhte chu hneh zawka vil a nih theih nan hmalak mek a ni," a ti a; lungrualna leh ṭanrualna ṭha awmna district-a siam zel turin kalkhawmte a chah.

Sâwt zawka hna kalpui a nih theih nan Mizoram sorkar hnuaia thawktu te leh Autonomous District Council hnuaia thawktute inkarah thawhhona ṭha siam a pawimawh thu sawiin Biakzauva chuan, "Ram dang nena inkalpawhna changtlung tak a awm theih nan Lawngtlai district chhungah hmalakna lian tak kalpui mek a ni a, sumdawnna hmunpui leh Mizoram luhkapui ni tura inpuahchah a ṭul," a ti.

C Ngunlianchunga pawhin thu sawiin, Lawngtlaiin district dinhmun a luah theih nana khatih laia sorkara thuneihna chelhtute hmalakna fakawm a tih thu a sawi a, "Harsatna leh retheihna aṭanga khaichhuah kan nih theih nana district dinhmun pek kan ni hi hlut thiam a, district changkang, hmasawnna inkhairual leh kawng hrang hranga entawntlak ni turin ṭangrual ang u," a ti bawk.

He hunah hian LADC-a executive member-te, Lawngtlai district-a sorkar pisa hrang hrang hotu te, khawtlang leh tlawmngai pawl hruaitute an tel a; Lawngtlai DC pisa-a thawktute zinga thi te sûnna hun hman niin, jubilee puala buatsaih lehkhabu leh memento tlangzarh a ni.