Chenna in 1,23,141-ah tui connection pe tawh

Thingtlang khuaa chenna in zawng zawng hnena tui connection pek vekna tura duan, Jal Jeeven Mission (JJM) hnuaiah Mizorama thingtlang khua 352-a in 1,23,141-ah tui connection pek a ni tawh a, hmalak mekna khua 322 a awm.

Public Health Engineering (PHE) department-in kum 2019-2023 chhunga an hmalakna an tarlan danin, thingtlang khua 677-a chenna-in 1,33,060-ah JJM kaltlangin tui connection pek tur a ni a, tui connection pek hna hi March 2024-ah zawh vek tur a ni. JJM kaltlang hian thingtlang khua 352-a in 1,23,141 (92.55%)-ah tui connection pek a ni tawh a, khua 322-a chenna-in 9,919 (7.45%)-ah hmalak mek a ni.

JJM kaltlanga Mizorama thingtlang khua 677-a chenna-in 1,33,060-a tui connection pekna tur hian sorkar laipui aṭangin cheng vbc 1,529,61 ruahman a ni a; cheng vbc 1,120.44 hmuh tawh niin, sum hmuh tur cheng vbc 390.87 a la awm.

NABARD hnuaiah khua 24-ah tui pek hna thawh a ni a, khua 18-ah thawh zawh tawh niin, khaw parukah hna thawh mek a ni. Khua 24-a tui pek hna thawh nan cheng nuai 15,590.09 ruahman a ni a, PHE dept. chuan cheng nuai 14,529.02 hman tawh a ni. Sorkar kum 2023-24 kal mekah cheng nuai 3,267 sengin Ruantlang WSS (solar pumping), Niawhtlang I&II MVS (solar pumping), Hmuncheng WSS (solar pumping) leh Thentlang WSS thawmṭhat hna thawh tum a ni.

PHE department hian Non-Lapsable Central Pool of Resource (NLCPR) hnuaiah Champhai Keilungliaha tuikhuah leh recreation siam nan cheng nuai 1,988 leh Chhingchhip Sainik School-a tui pekna (water supply) atan cheng nuai 1,716.16 an hmang a; NLCPR hnuaia PHE dept. hna thawh pahnih hi a vaiin cheng nuai 3,704.16 man a ni.

20% Gross Budgetary Support (GBS) hnuaiah Greater Khawzawl Water Supply Scheme siam nan cheng nuai 2,497 leh Biate Water Supply Scheme siam nan cheng nuai 1,364.67 hman a ni. North East Special Infrastructure Development Scheme (NESDIS) hnuaiah Alternate Gravity Water Supply Scheme of Aizawl siam nan cheng nuai 11,250, Augmentation of Greater Mamit Water Supply Scheme (Pt-II) siam nan cheng nuai 3,963.90 leh Augmentation of North Vanlaiphai Water Supply Scheme siam nan cheng nuai 1,986.64 hman a ni.

SASCI hnuaiah cheng nuai 3,091.11 sengin project panga thawh a ni a, project thawhna atana sum hmuh tur cheng nuai 768.56 ala awm. Khawpui (census town) 19-ah AMRUT 2.0 kaltlangin tui lakte thuamṭhat hna thawhna tur cheng nuai 14,503.03 hu project 20 ruahman a ni.

Swachh Bharat Mission (Grameen) hnuaiah Solid Waste Management 423, Liquid Waste Management 388, Community Sanitary Complex 42, Segregation Shed 192, individual householh latrine 15,200 siam a ni tawh a, heng thil hrang hrang siam nan hian cheng nuai 3,623.17 hman a ni.

Mizoramah khawlaia e awm lohna (open defecation free) Plus 'Model' khua 349, ODF Plus 'Rising' khua 14 leh ODF Plus 'Aspiring' khua 32 a awm tawh bawk.