KHAWTHLIR

Lokayukta member

September 26, Thawhlehni khan chief secretary Dr Renu Sharma chuan notification ti chhuakin, Governor-in Lokayukta member atan Lalsanglura, MPS (Rtd) a ruat thu a tarlang. Lalsanglura hi Anti Corruption Bureau (ACB) SP ṭhin, Lokayukta member a nih dawn vanga voluntary-a pension a ni.

Tanpuina hlan

Isua Krista Kohhran (IKK), Gen. Headquarters, Vaivakawn chuan nimin khan Manipur buaina avanga Mizorama rawn raltlante ṭanpuina atan Central YMA hnenah cheng nuai 2.7 an hlan.

MCPSSW Assembly

Mizoram Child Protection Service Staff Welfare (MCPSSW) chuan nimin khan Chanmari YMA Hall-ah Assembly vawi 2-na an hmang a, Social Welfare & Tribal Affairs minister Lalrinawma'n a hmanpui. Assembly-ah hian chawhnu lamah rorel inkhawm leh kum 2023-2024 atana hruaitu thlanna an nei a; president atan TC Lalhruaitluanga, Aizawl DCPU, secretary atan C Malsawmtluanga, Observation Home, Aizawl leh treasurer atan C Lalrinsangi, SCPS te thlan an ni.

2 Mizo Bn. NCC

Mizoram chhim lama NCC Cadet training zawng zawng huam tel vek tura din 2 Mizo Battalion NCC chu Lungleiah bulṭan a ni a; tunhnai khan Silchar Group Commander Brigadier Kapil Sood-an a tlawh. 2 Mizo Battalion NCC hian Mizoram chhim lama sikul leh college hrang hranga NCC cadet 3,500 vel a enkawl dawn a ni.