Champhaiah haw tharte dahna tur sawiho

Champhai khawpuia community quarantine centre tura ruat - Bethel Kohhran Hall leh Veng­thlang North Sunday School Hall-te hman dan tur leh inkaihhruaina chungchang inhrilhna hun Bethel Pastor Quarters leh Vengthlang North Kohhran Committee Room-ah neih a ni. Bethel Kohhran Hall leh Veng­thlang North SS Hall-te chu tangkhang thleng leh hmasa turte dahna atan hman ni se, an ti.

Meeting-ah hian Dr Samuel Laldinthara chuan, rapid antibody test (RAT) zingah reactive (positive) an awm chuan Champhai District Hospital-ah an throat swab sample lain, ZMC-ah thawn tur a nih thu a sawi a, "Covid-19 hi pawngpaw hlauh tur a ni lo a, PPE pawh damlo leh rinhlelhte bula awm ngaite a nih loh chuan hman kher a ngai lo. Quarantine centre-te hi medical team-in a ṭul leh mamawh dan ang zelin an vil reng dawn a ni," a ti.

Champhai SDPO C Lalsawta pawhin, community quarantine centre venhimna chungchangah, a ṭul ang zelin police-te'n an tlawh kual ṭhin dawn thu a sawi.

Champhai district-a quarantine centre pa­hnih, DPRC-ah mi 22 leh Tlangsama Polytechnic-ah mi 66 an awm mek. Kawng laka thang mek Manipur aṭanga haw mi pakua, Meghalaya aṭanga haw mi 25 leh Telangana aṭanga haw mi 40 vel an awm a; May 25, 2020 hian Karnataka aṭangin mi 96 vel an haw dawn bawk.

Champhai leh a chheh­vela kohhran 18 chuan an hmunhmáte community quarantine centre atan hman an inhuam thu sorkarah an thlen tawh a, chu'ngah chuan mi 400 vel an leng ang. Kohhran 18 zinga paruk chuan khung hrante ei leh in an tumsak dawn thu an sawi a; venhimna lamah pawh kohhran 17 chuan anmahniin an enkawl theih tur thu an sawi bawk.