MZP-in article inziahsiak result a puang

MZP Gen.Hqrs. chuan article inziahsiak an buatsaih result puanna leh lawmman semna inkhawm nimin khan an pisapui cofe­rence hall-ah an hmang a, Mizoram Youth Commission (MYC) chairman Dr Vanlalṭanpuia, MLA khuallian a ni.

Dr Vanlalṭanpuia chuan, MZP-in zirlaite tana inelna thianghlim an buatsaih chu ṭha a tih thu a sawi a; MYC chu Mizo ṭhalaite tan chak taka kal turin a inpuahchah mek tih sawiin, "Ṭhalai coaching kal dan turte leh IAS tling ngei turin hma kan la mek a ni. Kan ramah Zo nun ze mawi kalpui thar a ṭul a, corruption laka fihlîm leh ram hmangaihtu tak tak kan mamawh a, chutiang mi chher chhuah kawngah chuan MYC-in theihtawpin hma a la zel a ni," a ti.

MZP president B Vanlaltána chuan, hripui léng vanga inkhàrkhip chhungin zirlaite thluak sâwi zawi nan ṭangkai a nih beiseiin article inziah­siak an buatsaih tih a sawi a; "Zirlaite chu kan thil tihna kawng hrang hrangah kan hnam ropuizia puang tur te, kan hnam tana ding tlat turte kan ni," tiin, zirlaite chu ram leh hnam himna ngaihtuah chunga zir zel turin a chah.

Article inziahsiak hi hlawm pathumah ṭhen a ni a, primary school aṭanga college/university thlenga zirlaite inelna buatsaih a ni.

Category-I ah thupui chu 'Bible-a ka mi ngaihsan leh a chhan' tih niin, Lalrinchhani, PES, Reiek chu pakhatna a ni.

Category-II ''Kan hnam pasalṭha ka ngaihsan leh a chhan' tih thupui­ah Lal­dintluanga, Lung­leng H/S pakhatna a ni.

Ca­tegory-III 'Inkhàr­khip­in a ṭha zawnga Zo fate a nghawng dan' tih thupuiah KC Chawng­thankhuma, Mizoram Law College-a LL.B zirlai pakhatna a ni thung.