KHAWTHLIR

October 3, Inrinni khan KṬP, Dawrpui Vengthar West Branch-in Aizawl Civil Hospital tan thisen unit 32 an pe a, petute mipa 28 leh hmeichhia pali an ni a; KṬP, Bethlehem Vengthlang Branch KTP pawhin an din champha vawi 26-na pualin Synod Hospital tan unit 31 an pe a, petute mipa 29 leh hmeichhia pahnih an ni. Champhai AVBD leh Zion Veng Branch YMA-te'n National Voluntary Blood Donation  Day pualin thisen pek an huaihawt a, Zion Veng YMA member mipa 15 leh hmeichhia pakuate'n District Hos­pital-ah thisen unit 24 an pe a ni.

St. Xavier's College chuan October 3, Inrinni khan a vawi khat nan an college-ah Graduation Day an hmang. He hunah hian footballer Jeje Lalpekhlua chu khuallian a ni a, Aizawl bishop Most Rev. Stephen Rotluanga'n a hmanpui bawk.

Covid-19 a darh vanga containment zone atana Bawngkawn puan tawh chu nimin tlai dar 3:30 khan hlih a nih thu, Aizawl District Magistrate chuan thupek chhuahin a tarlang. Bawngkawn hi September 22, 2020 khan containment zone-ah puan a ni.

Mamit bialtu MLA H Lalzirliana chuan Inrinni khan Mamit khawpuia sorkar hmalakna leh hmachhawpte a tlawh a, hnathawh dan a enfiah. H Lalzirliana hian Mamit district education office pisa te, Mamit HSS bula lung rem mek te, Mamit H/S leh HSS voleyball court chei ṭhat dan tur te, Mamit District Hospital leh football khelmual siam ṭhat dan turte a enfiah a ni.

Ṭawi bialtu MLA R Lalzirliana, Power & Electricity minister chuan October 3, Inrinni khan a bial chhunga khaw 14 hnenah nizung chakna hmanga tihen theih, solar street light 363 a sem. Minister hi ZEDA director David Ramnunsanga'n a ṭawiawm a ni.