P&E department-in sum an hloh nasa: Corporation-a leh a nih chuan êng chhit man nasa takin a pung ang - P&E Minister

Power & Electricity minister R Lalzirliana chuan nimin khan Aizawl Press Club-ah thuthar thehdarhtute a kawm a, an department sum hloh dante a tarlan rualin, corporation-a leh a nih chuan mipuiin êng an chhit man nasa taka a pun tur thu a sawi.

R Lalzirliana chuan, Mizoramin power supply a mamawh sàn lai berin megawatt (mw) 159.12 a nih thu a sawi a, "Chu chu January 19, 2023-ah a ni a, kan mamawh hniam lai berin mw. 45 vel kan mamawh. Hetihlai hian state-in kan thar chhuah mw. 13 (Tuirial HEP leh Vankal Solar huam loin) vel a ni a, a bak zawng chu kan lei a ngai a ni," a ti.

P&E Minister sawi danin, an department hian an sum hmuhchhuah leh inenkawlna senso atana an hman aṭanga chhûtin kum 2020-2021 ah cheng vbc. 408.29, 2021-2022 ah cheng vbc. 299 leh 2022-2023 ah cheng vbc. 203.81 an hloh.

P&E dept. chu corporation-a leh mai duhnate a awm thu sawiin R Lalzirliana chuan, "Kan Chief Secretary kalchhuakta khan leh ngei a duh a, hma pawh a la. Gujarat nen a khaikhin a, anni ang state lian leh intodelh nen chuan khaikhin chi kan ni chiah lo. Harsatna a awm avangin kan ti ta lo," a ti a, corporation-a leh chu a ṭhatna leh ṭhat lohna a awm tur thu a sawi.

R Lalzirliana chuan corporation-a leh a nih chuan sumdawng rilru pua organisation kalpui a nih tawh dawn thu sawiin, "Sum dinhmun azirin thawktute duh duh huna lak leh ban kalpui ṭhin a ni ang. Thawktute dinhmun aiin corporation sum dinhmun ngaih pawimawh a ni dawn," a ti.

P&E Minister sawi danin, Mizorama thingtlang khaw tê zawk (mipui cheng an tlemna) tam takin power supply an dawng lo nual ang.

Consumer tlemna khua, tlema khaw lian zawkte aṭanga hla tham deuhte phei chu an khua-a power supply thlentirna tura 11kV line thar siam nan leh maintenance cost, khawchhung LT line thar siam man leh maintenance costs, distributor transformers thar dah man leh maintenance costs etc. man zawng zawngte chhûtin chàwi belh a ngai dawn. Khaw te takte tea power thlentir ai chuan sumdawng thlirna rilru aṭang chuan power supply thlentir loh law law kha a thlanawm zawk dawn a ni.

Corporation-a leh a nih chuan êng chhit man nasa taka a pun tur thu sawiin R Lalzirliana chuan, "Corporation hnuaiah hian sorkarin kum tin mipuite êng chhit man a subsidised-sak ṭhin hi kalpui chhunzawm pawh la ni dawn se, thawktute hlawh, office inrelbawlna, power siam chhuahna man leh power leina man chhût ṭhin a ni tawh dawn," a ti.

P&E Minister sawi danin, corporation-a let kher loin tuna P&E dept. kal mek dan aia kalphung ṭha leh changtlung zawka inkaihhruai leh hnathawh a nih theihna atana Mizoram sorkarah 'Restructuring of Power & Electricity dept.' tih chu thehluh a lo ni tawh.