DRI official nia inchhalte man
Champhai Police-te chuan nimin zing khan Directorate of Revenue Intelligence (DRI) official nia inchhal mi pahnih leh an thurualpui pakhat an man.
Mizoram Police thuchhuah tarlan danin, Champhai Police-te chuan DRI official anga lemchang an awm thu report an dawng a, an chhui chiang nghal. DRI official lema chang mi pahnih leh an thurualpui pakhat chuan, September 18, 2023 khan lirthei veivak endik tura insawiin Khankawn Police Checkgate an tlawh thu leh, September 25-ah mi pakhat chu pawisa a pek loh chuan manah vauin pawisa an lakluihsak tih hriat chhuah a ni.
Champhai Police-te chuan uluk taka an chhui zui hnuah he thila inhnamhnawih Laltharzeli d/o Lalropuia, New Champhai, PB Rozamliani w/o Johny Lalthlamuana, Kahrawt, Champhai leh Johny Lalthlamuana s/o Lalhlumthanga, Kahrawt, Champhaite chu nimin khan an man.
Heng mi pathumte kut aṭang hian DRI identity card lem pahnih man niin, Champhai Police Station-ah thubuai siamsak an ni.