Ruling lam pawh ZPM sawi lo chuan an awm thiam tawh lo - ZPM Leader
Aizawl North-III Block ZPM chuan nimin khan Chanmari YMA Hall-ah conference an hmang a, an hun hmanpuitu ZPM leader Lalduhoma chuan, ruling lam pawh ZPM sawi lo chuan an awm thiam tawh lo niin a sawi.
ZPM Leader chuan, Mizoram political history thlir chuan sorkar turin thil pahnih a ngai tih a sawi a, "A pakhatnaah chuan sorkar atana an duh party nih leh sorkar tura an rin party nih a ngai. Chu dinhmun chu ZPM chuan kan lo luah ve ta. Party dang pawhin min pawmpui niin a lang a, ruling lam pawh ZPM sawi lo chuan an awm thiam tawh lo," a ti.
Sorkar tur chuan sorkar dinglai dawttu nih a ngai tih sawiin Lal-duhoma chuan, "Sorkar dinglai a tlakin inthlan hmasaa pahnihna kha a thlaktu atan mipuiin an hmang ṭhin. Ruling party nen tunah hian final kan khel chho mek," a ti a, tunhnai inthlan awm reng rengah Pathian leh mipui zarah pakhatna dinhmun an luah deuh vek thu a sawi.
Lalduhoma chuan Pathian leh mipui zarah MLA inthlan lo awm turah sorkarna an chan ngei a beiseiawm hle tih sawiin, "Chapo lo, thuhnuairawlh takin hmalam kan pan zel a ngai. Party dang hian an policy an sawi hman lo a, ZPM hi an buaipui ber a ni ta hi a lawmawm hle. Ram hnuk khawih lem lo, thil eng emaw hlek hriat fuh loh a awm pawhin dawt sawi hmangah min chhuah duh ta zel mai, kan fimkhur deuh deuh a ngai a ni," a ti
Aizawl North-III a ZPM candidate tur K Sapdanga, ZPM working president pawhin thu sawiin, "Sorkar kaltate khan an hun laiin ram siam tumin theihtawp an chhuah ṭheuh a, tuna kan dinhmun hi min lo hruai thleng a, an fakawm hle a ni," a ti a, an hun laiin thawhṭhat tam tak leh tih fuh lem loh pawh tam tak an neih thu a sawi.
K Sapdanga chuan Pathian leh ram mipui zarah sorkarna an lo changve te a nih chuan, sorkar kal tawhte thawhṭhat chu entawn tur a nih thu sawiin, "An tih fuh lem lohte pawh zirlaibu ṭangkai tak an ni ang. Ram leh mipui tana ṭangkai tur a nih phawt chuan hmaa mite sulhnu chhunzawm hi kan hreh dawn lo a, ram tana pawi tur a nih erawh chuan, thawh laklawh pawh ni se, ennawn leh hi kan tim lo ang,” a ti.
ZPM Working President chuan an khingpui party-te chuan sum chakna hmanga hnehna chan an tum dawn tih sawiin, "Party sum pawh ni lo, pawl sum pawh ni lo, sorkar sum SEDP te, SASCI te chu vote zawn nan bial tinah ualau takin an sem mek," a ti a, kum 2018 inthlan dawna an insawi batte pawh 2023 inthlan dawnah an tiam zat hmun 12-a ṭhena hmun hnih vel an sem thei hram tih a sawi.
Aizawl North-III Block ZPM conference hi an president Zoremsiama'n kaihruaiin, Aizawl West-II biala an party candidate Lalnghinglova Hmar pawhin thu a sawi. An party thuchhuah tarlan danin, ZPM Working President-in an party-ah mithar a lawmlut.