MNF chuan kalphung nghet kan nei - MNF Vice President

Champhai MNF North Block I leh II chuan nimin khan Kahrawt community hall-ah joint conference an hmang a, an hun hmanpuitu MNF vice president Lal-thlengliana chuan, "MNF chuan kalphung nghet kan nei. Kalphung thar kan ti ve ngai lo," a ti.

MNF Vice President chuan, MNF chu party hming thlak ve miah loa kum 61 kal tawh a nih thu sawiin, "A bulthûm aṭangin a thil tumah Pathian a tel. 'Pathian leh kan ram tan' tia kalphung nghet nei kan ni a, kalphung thar kan ti ve ngai lo," a ti a, kalphung an neih avangin an hotute an insawn ve ngai loh thu a sawi.

ZPM leader Lalduh­oma chu kum 24 chhungin pawl 10-ah a ṭhu a, matric a pass dêr tih sawiin MNF Vice President chuan, "Ama party din pawh pali a kalsan tawh," a ti.

Lalthlengliana chuan hripui karah Chief Minister-in 'chaw kan nghei thiang lo' tiin harsa takin pawn lam aṭangin an la lut tih sawiin, "MNF sorkar hnuaiah Burma raltlan 50,000 chuang an lo lut a, 8,000 vel free education kan pe. Tin, Manipura kan unaute pawhin Mizo nationalism-ah an ṭhangharh ta," a ti a, kalphung nghet sorkarah chuan hnam inpumkhatna a thleng mek niin a sawi.

Champhai MNF Block I leh II joint conference hi block-I president HS Vanlalfakzuala'n kaihruaiin, MNF adviser Dr ZR Thiamsanga, bialtu MLA pawhin thu a sawi. MNF party thuchhuah chuan MNF Vice President hian an party-ah mi 925 a lawmlut niin a tarlang.