Mizoram sorkarin ṭhalaite hmasawnna turin a tam thei ang hna thawh a tum - Dy.CM

Deputy chief minister Tawnluia chuan nimin khan Vangtlang khuaah Water Supply Scheme leh community hall a hawng a; Mizoram sorkarin ṭhalaite changkan leh hmasawnna turin a tam thei ang ber hna thawh a tum tih a sawi.

Tawnluia chuan, khawvel changkang zelah Mizo hnam thinlung put zel a pawimawh thu a sawi a, "Mahni hma zawn ṭheuhah hnam rilru put a ṭul. Mizoram sorkar chuan ṭhalaite changkan leh hmasawnna turin hna a tam thei ang ber thawh a tum a, zirna leh infiamna kawnga ṭhalaite chher chhuah a pawimawh hle," a ti.

Vangtlang khuain hun lawmawm tak a tawng mek tih sawiin Tawnluia chuan, "In tina tui pek a ni a, community hall thawmṭhat a nih bakah, Vangtlang High School chu lumpsum category C-ah hlankai a ni," a ti a, Vangtlang aṭanga Tuipui lui inkar kawng laihna tur cheng nuai 10 leh Vangtlang Community Hall cheiṭhatna tur Rs 5,00,000 sanction hmuh thuai beisei a nih thu a sawi.

Vangtlang Water Supply Scheme (Solar Pumping) hi Jal Jeevan Mission 2021-2024 hnuaiah cheng nuai 320 senga siam a ni a, contractor chu HS Construction a ni. Solar Pumping hmang hian Sihpui lui tui lak niin, mi 700 chawm zo tura ruahman a ni a; ni tin tui litre 37,000 pump chhuak thei tur a duan a nih bakah, hian Vangtlang tui lakna thin ‘Kawlkhuma Kai’ thawmṭhat hna thawh tel a ni.