Kum 1 dawn hnuah EFCC hnuaia thawkte hlawh pe: CITUM-in hnathawktu bantirna sût an duh

Centre of Indian Trade Union Mizoram (CITUM) chuan Environment, Forest & Climate Change (EFCC) department hnuaia wildlife guard leh anti-poaching squad-te hlawh pe kim thuai tur leh a hun takah hlawh pe ṭhin turin Mizoram sorkar an ngen.

CITUM chuan thuchhuah siamin, Integrated Development for Wildlife Habitats hnuaia CSS sum hmanga chhawr wildlife guard-te leh Compensatory Afforestation Fund Management & Planning Authoriy (CAMPA) sum hmanga chhawr anti-poaching squad-te hlawh kum khat dawn Mizoram sorkarin a pek tawh loh hnua tunhnaia a pe chu lawmawm an tih thu an sawirualin, hlawh la pek lohte pe thuai turin sorkar an ngen a; "Hlawh hi a hunah tak an lak theihna tura hma min laksak turin thuneitute kan beiseiin, kan ngen a ni," an ti.

Wildlife guard leh anti-poaching squad-te hlawh hi Mizoram sorkar sum a nih loh thu sawiin CITUM hotute chuan, "Central aṭanga lo kal a ni a, chutihrualin central-in an hlawh tur Mizoram sorkara an rawn pek theih nan utilisation certificate (UC) a ngai. UC hi EFCC department hnuaia thawkte inthlahdah vangin a hunah central-ah an thawn thei lo ṭhin a, hei vang hian wildlife guard leh anti-poaching squad-te hian a hunah hlawh an la thei lo ṭhin," an ti a; wildlife guard leh anti-poaching squad te zingah kum khat dawn hlawh lak loh vanga harsatna tawk eng emaw zat an awm hman thu an sawi.

CITUM chuan EFCC department hnuaia a nghet loa thawkte duh hun hunah bàn an nih ṭhin thu an sawi a, "Tunhnaiah EFCC dept. hnuaia kum 10 dawn lo thawk tawhte chhan leh vang ṭha tak awm loa bàn an ni a, hei hi ṭha kan ti lo hle, " an ti a; a rang thei ang bera sût leh turin sorkar an ngen.

CITUM hotute chuan, tunhnaiah mi pahnih ban an nih thu leh a hma deuhin mi 12 ban an nih tawh bawk thu an sawi a, "A hmaa mi 12 an ban zinga pakhat chu EFCC depat. in an la let leh. Hemi chungchangah hian PCCF kan hmu a, mi 12 ban an nih chungchang hi a lo hre ve lo," an ti a; "Tunhnaia mi pahnih an ban ringawtte chungchangah EFCC minister Pu TJ Lalnuntluanga leh Lawngtlai East bialtu MLA Pu H Biakzauvate kan hmu a, hma an lakna nghak rih tura min ngen angin kan nghak rih dawn," an ti a; chhan leh vang ṭha tak awm loa hna aṭanga in ban chu Labour Law bawhchhiatna a nih thu leh an beisei anga sorkarin hma a la lo a nih chuan court-a kal an tum thu an hrilh tih an sawi.