Aizawl North College campus-a DIET ram rin luh tumna DIET zirlaite'n an duh lo

District Institute of Education and Training (DIET) zirlai pawl - Trainees' Union chuan nimin khan thuchhuah an siam a; DIET Campus huam chhunga DIET Principal Quarters chu Aizawl North College campus-a rinluh tuma hmalakna an dem thu leh ṭha an tih loh thu tarlangin, hma laksak turin sorkar an ngen.

DIET Trainees' Union chuan, tun hnaiah an Principal quarters chu Aizawl North College campus-a rinluh tuma hmalakna a awm thu tarlangin, "September 27, 2023-a Mizoram sorkar Cabinet Meeting agenda hiala an sawiho tih kan hriatin keini DIET zirlaite chuan mak kan ti a. Hetianga inhrilhhriatna leh inràwnna awm miah lo a kan institution ram liau liau min neih sak tuma min chuh hi kan hrethiam lo a, an hmalakna hi kan dem hle a ni," an ti.

MBSE building aṭanga mualthla zawng hi DIET ram, Basic mual tih ṭhin a nih thu sawiin Trainees' Union chuan, "Land Lease-ah chuan DIET ram chhung hi 'For the location and purpose of DIET' tiin a inziak a, tunhma aṭangin DIET ram hi sahthlak a lo ni fo tawh. Tunah hian India rama DIET mumal taka kal 613 zingah Centre for Excellence atan DIET 125 thlanchhuah zingah DIET Aizawl hi a tel ve a, Centre for Excellence hian grant cheng nuai 1,500 a rawn keng tel," an ti.

Grant hmang hian hostel pali, quarters, parking area, green space leh teachers education atana pawimawh sak a ngaih dawn thu leh tuna a lan dan chuan an ram neih chhunah hian hengte hi an sa puitling thei angem tih chu ngaihtuah fe tham a nih tawh thu Trainees' Union an sawi.

DIET Trainees' Union chuan an ram neihchhun Aizawl North College campus-a rinluh tumna chu ṭha an tih loh thu an sawi a, "Kan ram hi chàn zel kan phal tawh lo a, kan theih chhung chu kan ram la neih ve chhun hi hum tlat kan tum. Mizoram sorkar pawh kan duhnate min hriatthiampuia, a theih anga ranga hma min laksak turin kan ngen nghal a ni," an ti bawk.

DIET ram sahthlak tawh dan
(Trainees' Union tarlan angin)

■ LAD Office atan.

■ Trade and Commerce Office atan.

■ MBSE leh SCERT building atan.

■ Ramhlun North Bazar atan.

■ PHE Site Office atan.

■ Aizawl North College building atan.

■ Ramhlun-Chaltlang Road Widening atan

■ DIET playground-ah Aizawl Smart City Project-in Multipurpose Hall sak hna an kalpui mek.