World Rabies Day hmang

Nimin kha World Rabies Day a ni a, Mizoram hmun hrang hrangah hman niin, Rabies awareness programme leh a thlawnin ui leh ran dangah ui a hri (Rabies) laka invennna damdawi AntiRabies Vaccine (ARV) pek a ni. Kumina World Rabies Day thupui chu 'All for One, One Health for All' tih a ni.

World Rabies Day hi Aizawlah chuan Veterinary Polyclinic Hospital, Khatlaah hman a ni a; VS&PH addl. director Dr C Lalrintluanga'n thu sawiin, "Ui a hri (Rabies) hi natna hlauhawm tak, mihring pawhin a kan kai theih, a kaite 99% thih theihna a ni, chuvangin tihdam aiin a venna hi a pawimawh zawk," a ti.

Kum 2022 khan India ramah mihring sing télin ui a hri hi an kai tih sawiin Dr C Lalrintluanga chuan, "Mi 230 laiin an thihpui a ni, Goa state chauh hi Rabies free state-a puan a ni a, kum 2030-ah chuan India ram hi ui a hri awm lohna, Rabies free-a puan tum a ni," a ti a, khawvela ui a hri kai 36% vel chu ui seh vanga kai an nih thu leh Antirabies vaccine chu ui, zawhte leh ran dangah pek vek a pawimawh thu a sawi.

Champhaiah chuan District Veterinary Hospital-ah World Rabies Day pualin ui a hri laka venna damdawi pek runpui, Free Rabies Vaccination neih niin, damdawi hmangin ui 115 chiu a ni.

India ramah kum tin ui a hri vangin mi 18,000 - 20,000 vel thi an awm ṭhin a; World Rabies Day-in a tum ber chu ui a hri hi mihring leh ran aṭanga hnawh bo a ni.