Minister-in Silver Jubilee a hmanpui

Chhiahtlang Chhim Veng Branch YMA chuan nimin khan an kum 25-na, Silver Jubilee an lawm a, minister Lalrinawma'n hmanpuiin, jubilee lungphun a hawng.

Lalrinawma chuan, Mizoramah ṭha taka pawl lian leh pawimawh tak YMA a kal zel chu lawmawm a tih thu a sawi a, "Tun hnaiah Uniform civil code sawi rik ni ṭhin mah se, kan remna thu ziahah khan Mizoram Legislative Assembly-in a pass loh chuan pawm a ni lo ang, tih a nih avangin huaisen takin kan ṭang ngam a, hun kal tawha kan tawrhna nasa tak kha a thlawn lo," a ti.

Khawvel zim zel in hnam tenau zawkte a nek ral tial tial tih sawiin Minister chuan, "Keini hnam tlemte hi kan boral loh nan keini ho hi nghet taka kan din tlat zel a ngai a, kan pipute nunzia kan chàwi nun zelna pakhat atan Mizote Kût pawimawh tak mai, Mim Kût pawh hman thar leh tuma hmalak mek a ni," a ti a, hnam nun leh ziarangte vawnghim tlat turin kalkhawmte a chah.

Chhiahtlang Chhim Veng Branch YMA chu January 17, 1982 khan Chhiahtlang Branch YMA hnuaiah Section F ni tura din a ni a; January 29, 1998-ah Chhiahtlang Branch hnuaia Section hrang hrangte chu branch puitlinga dah an nih angin Chhim Veng Branch tih a lo ni ta a ni. YMA member mipa 254 (life member 13) leh hmeichhia 101 (life member 1) , an vaiin member 355 an awm mek a ni.