Politician leh sorkar hnathawkte zingah ṭha taka hna thawh duh tam tak an awm - TJ Lalnuntluanga

Environment, Forests & Climate Change (EFCC) minister TJ Lalnuntluanga chuan nimin khan Kolasib district-a Saiphai khuaah Forest Rest House sak thar a hawng a; politician leh sorkar hnathawkte zingah hlemhletna thila inhnamhnawih duh lo, dik tak leh ṭha taka hna thawh duh mi tam tak an awm tih a sawi.

TJ Lalnuntluanga chuan, Saiphai Forest Rest House sak chu bialtu MLA Lalrinsanga Ralte ṭhahnem ngaihnaa bulṭan a nih thu leh a puitlin nana Mizoram sorkar hotu te, EFCC hotute leh Kolasib Forest Division-a thawktute hmalaknaah lawmthu a sawi a, "Politician leh sorkar hnathawkte zingah hlemhletna thila inhnamhnawih duh lo, dik tak leh ṭha taka hna thawh duh mi tam tak an awm a, mipuiin politician leh sorkar hnathawkte an thlir danah ngaihdan hê deuh awm sa ṭhin hi a ṭha lo," a ti.

Midang sawisel leh ep zawng ni loa a ṭha zawnga infuihna leh an thiltih ṭhat fakna ri tam se a duh thu sawiin Minister chuan, "Chu chuan thawktuteah phûrna leh hna ṭha thawh zel duhna rilru a tuh ang a, khawtlang titiah pawh ngaihdan ṭha leh ngil a rik tam chuan ram pawh a ṭha zawngin a ṭhang ngei ang," a ti.

Serlui bialtu MLA Lalrinsanga Ralte pawhin thu sawiin, Saiphai chu ramri depa awm a nih avangin mikhual pawimawhte thlenna tur khùalbûk mamawhna a sang hle tih a sawi a; EFCC department-in khawtlang an duhsakna chu hria a, ṭha taka anmahni thawhpui zel tur leh Forest Rest House enkawlnaah pawh dimdawih taka enkawlpui turin khawtlang mipuite a chah.

Saiphai Forest Rest House hi EFCC Department hnuaia Maintenance Fund aṭanga sum hmuh cheng nuai 20 senga sak a ni a; mutna pindan pahnih bakah, ṭhutkhawmna pindan leh chokate a awm a ni.