Suposhan Diwas Motor Cycle Rally vailiam

Social Welfare & Tribal Affairs minister Lalrinawma chuan nimin zing khan Bawngkawn Brigade kawngah ei leh in ṭha leh hrisel pawimawhna inzirtirna POSHAN Maah 2023 puala Aizawl Thunders in ‘Suposhan Diwas Motor Cycle Rally’ an bautsaih a vailiam a, rally-a telte hi Silaimual thleng an tlan a ni.

Lalrinawma chuan, sorkar laipuiin a ruahman angin POSHAN Maah-ah hian mipa ten mawhphurhna pawimawh tak an neih avangin 'Pa te ni' (Suposhan Diwas) hman tura duan a nih thua sawi a, "Ei leh in ṭha kan nupui fanauten an neih theih nan hian mipa te hian mawh kan phur nasa hle a, an himna hi keimahniah a innghat tlat a ni," a ti.

Nu in nau a pai hlim aṭanga nau a neih thleng leh a enkawlna chu hmeichhiate kut chauha dah chi a nih loh thu sawiin Lalrinawma chuan, "Mipate koah hmeichhiate mawhphurhna aia nasa zawk a innghat a, nupui fanau enkawl chu mipa mawhphurhna, mipa koa innghat tlat a nih thu a sawi.

He hunah hian Women & Child Development director Zoramthangi Chhangte kaih-hruaiin kalkhawmte'n slogan an sawi rual a ni.