KHAWTHLIR

KṬP-in thisen pe

KṬP, Sihphir Vengthar Bial chuan nimin khan Synod Hospital Blood Centre tan thisen unit 26 an pe a, petute mipa 22 leh hmeichhia pali an ni.

Dan phal loh man

Assam Rifles leh Custom Preventive Force ṭangkawp chuan September 27, Nilaini khan foreign cigarette case 14 leh foreign beer case 10, a pahniha cheng nuai 18.56 man hua chhût an man.

Dy.CM-in tlawh

Deputy chief minister Tawnluia chuan nimin khan a bial chhunga Khawhai, Chalrang leh New Chalrang khua a tlawh a; sorkarin kawng hrang hrangah ṭhalaite hmakhua ngaiin hma a lak thu sawiin, "Heng hmalakna zingah hian zirna (education) chu sorkarin a ngaih pawimawh berte zinga mi a ni," a ti.

MLA-in hmanpui

Mamit bialtu MLA H Lalzirliana chuan September 27, Nilaini khan Tuipuibari Secondary Samagra Shiksa School thar lawmna a hmanpui a, Foundation Stone a phum nghal. MLA chuan, Tuipuibari PHC a thawk tur doctor hmuh a nih ve leh hawn nghal a nih dawn thu a sawi. Tuipuibari khua-ah hian chenna in 750 awmin, mihring 3,500 vel an awm mek a ni.

Vangpui Day

Rabung Branch YMA chuan September 27-28, 2023 chhung khan Vangpui Day leh YMA Diamond Jubilee kharna hun an hmang a; AMC deputy mayor R Thanglura'n hmanpuiin, jubilee souvenir 'Zawlnghak' tlangzarh. R Thanglura chuan, khawvel changkang chho zelah tunlai ṭhalaite an vanneih tawh thu a sawi a, tlawmngaihna chhawm nung zel turin a sawm nghal.

Kawng khar dawn

Hortoki leh Meidum inkar kawng chu October 1-31, 2023 chhungin kar tin Thawhlehni aṭanga Inrinni thleng lirthei kal phal loha khar a nih dawn thu Kolasib SP Lalrinawma Ṭaite-in a tarlang a; thupek zawm lo chu 177 MV Act hmanga hrem an ni ang.