Public Undertakings Committee-te'n Bangladesh-a insumdawn tawnna tur tlawh

Mizoram Assembly-a Public Undertakings Committee mem-ber-te chuan, January 30, 2016 khan Bangladesh ram chhunga Thekamukh-a India leh Bangladesh insumdawn tawnna hmunpui, border trade point tura siam mek an tlawh.

Assembly Public Under-takings Committee (PUC) mem-ber-te hi Bangladesh-a kalin, Inrinni chhun dar 12:30-ah Thekamukh an thleng a; tun thlenga hmalak tawh chinte zir chiangin, ramrîa inkalpawh theih dan turte an enfiah a ni.

Assembly PUC member-te chuan, Bangladesh sorkar aiawhte'n ṭha taka an lo dawn-sawn thu an sawi a, "Min dawn-sawn danah kan lâwm a, border trade hlawhtlinna tura hmalak meknaah Bangladesh sorkar lam pawh a inhawng hlein kan hria," an ti.

Dân anga border trade kalpui a nih chuan ram pahnihte'n kawng hrang hrangin an hlâwk-pui dawn tih sawiin, Bang-ladesh tlawhtute chuan, Tlabung kaltlanga sumdawnna chu Mizoram tan hmasawnna thlentu pawimawh tak a la nih ngei an beisei thu an sawi.

Assembly PUC-te ṭawiawmtu Rangamati additional DC Tanveer Azam Siddiqui chuan zawhna chhangin, ram pahnih inlaichînna chu tun dinhmunah a ṭha hle tih a sawi a; dân anga ram pahnihte an insumdàwn tawn theih nan káwl a êng chho mek tih sawiin, "Hmalakna kal mek zelah engkim a tluang a, inkalpawhna ṭha zawk a awm theih nan ruahmanna bawhzui mek a ni," a ti.

Assembly PUC-te'n border trade point tur an tlawhnaah hian an chairman Nihar Kanti Chakma bakah, member dang panga - JH Roṭhuama, PC Zoram Sangliana, John Siamkunga, Dr K Beichhua leh Lalrinawma-te an tel. Anni bakah hian Chittagong-a India sorkar assistant high commissioner Somnath Halder leh Rangamati additional DC Tanveer Azam Siddiqui te pawh an tel.

Public Undertakings Com-mit-tee member-te hi January 29, 2016 tlai khan Chittagong Chamber of Commerce and Industry hruaitute nen an lo inkâwm tawh a; nimin khan Rangamati DC Samul Arefin bakah sorkar mi pawimawh dangte an kâwm leh a ni.