April 2016-ah LSC chhiah tihniam dawn

Land Revenue & Settlement (LRS) depart-ment chuan sorkar kum thar, April 2016 aṭangin LSC-ah (in hmun bik) chhiah an lak ṭhin chu an tihniam dawn. Chhiah tihhniam tur hi square metre khatah Rs. 2 a ni tlangpui.

LRS department hotute hnen aṭanga thu dawn danin, LSC-a chhiah lâk tihhniam tum hi Assembly session-ah MLA-te'n LSC-a chhiah lak tur a sang nia an sawi vanga LRS minister R Romawia'n ennawn a tum thu a sawi bawhzuina a ni.

Revenue department-in LSC-a chhiah tihhniamna atan hian September 3, 2015-ah gazette-ah chhuah a ni tawh a; government gazette-ah chhuah a ni chunga sorkar kum kal meka a pangngaia chhiah an lak chhan chu kum 2015 khan district hrang hrangah assessment an tihfel vek tawh avangin, a hniama lak nghal a nih chuan assessment a buai vek dawn vang a ni.

LRS hotute chuan, assess--ment an siam tawh chu siam ṭhat lehna hun a awm tawh loh avangin a pangngaia kal rih a ngai niin an sawi a; gazetted angin, sorkar kum thar April 1, 2016 aṭangin LSC-a chhiah chu a rate tihhniamna angin lak ṭan a ni ang.

Chhiah bithliah zat hi district hrang hrangah a inang lo a, grade hrang hrang-ah thlen a ni. LSC pawh grade hrang hrangah ṭhen a ni a, chawhrualin grade parukah ṭhen a ni.

Champhai district leh Kolasib district chu a inang zela dah a nih laiin, district dang zawng chu a hrang veka dah a ni a; Champhai district leh Kolasib district-ah hian Grade-I ah rate hluiah Rs. 4 a nih laiin, kum tharah pawh Rs. 4 a la ni dawn a, grade dang zawngah erawh tihhniam vek a ni. Mamit district-ah Grade-I bik Rs. 3 chu rate tharah Rs. 3 tho a la ni dawn a, grade dang zawng chu a rate tihhniam vek a ni thung.

Revenue department-in 'Other Notified Town' tia a sawi, district head-quar-ters ni lo khaw lian zual eng emaw zatah pawh rate tihhniam tur a ni a; Grade I-IV thleng siam niin, rate tharah tihhniam vek a ni dawn.

Aizawl district bik chu grade parukah ṭhen a ni a; Aizawl district-a a hniam dan ang deuh vek hi district dang hniam dan a ni.

Aizawl dist-a LSC chhiah rate

Grade Rate hlui Rate thar

I Rs. 10.00 Rs. 8.00

II Rs. 8.00 Rs. 6.00

III Rs. 5.00 Rs. 4.00

IV Rs. 3.00 Rs. 2.50

V Rs. 2.00 Rs. 1.50

VI Re. 1.00 Re. 0.75