Damdawi lem finfiah a ni

September 2015-a Health department-a drug inspector-te'n damdawi lem nia an hriat, Chlorophenicol chu damdawi lem leh hlauhawm tak a ni tih finfiah a ni a, tichhe vek tura hriattir a ni.

Thu dawn danin, Health department-in khawsikpui damdawi anga a lei leh district hrang hranga mipui hnena sem tura pek chhuah tawh, Chloramphenicol hi drugs controller-ten endik atan Guwahati-a Regional Drugs Testing Laboratory-ah an thawn a ni.

Laboratory-a en-dik-na report, tun hnaia tihchhuahah chuan Chloramphenicol (Chloro 250) hi damdawi lem a ni a, damdawi hlauhawm tak a nih avangin a vaia tichhe vek turin Mizoram sorkar a rawn hriattir a ni.

Health department-in khawsikpui damdawi Chloramphenicol supply tura 2015 kum tir lama tender a chhuah chhangtu zingah Zedidia Enterprise chu thlan a ni a, Zedidia Enterprise chuan Hima-chal Pradesh-a AIMS International siam Chlo-ro-phenicol chu chahin a supply a, Health depart-ment-ah mûm 1,86,000 an pe hman a ni.

An damdawi supply chu damdawi lem a ni tih hmuhchhuah a nih avangin Zedidia Enterprise chuan an supply-na man an dawn tawhte chu sorkarah an pe kîr leh vek tawh. Damdawi an lakna, AIMS International chu damdawi lem tih hriat chhuah a nih hnuah biak theih lohin an awm nghal nia hriat a ni.