KHAWTHLIR

Evangelist tir chhuak

Synod Mission Board hnuaia Masihi Sangati Kendra buatsaihin, nimin chawhnu khan Vaivakawn Kohhran biak-inah evangelist tirh chhuahna inkhawm neih a ni. Evangelist kal chhuak turte chu Synod executive secretary Rev. B Sangthanga'n a tír chhuak a, fuihna thuchah a sawi nghal.

Thisen pe

Diakkawn Branch YMA chuan Kolasib District Hospital-ah thisen khawl an nei lo tih an hriat avangin Inrinni khan thisen unit 42 an pe a, a petute mipa 27 leh hmeichhia 15 an ni. Lunglawn bial ṬKP pawhin Inrinni khan Lunglei Civil Hospital-ah unit 24 an pe a, a petute mipa 23 leh hmeichhia pakhat an ni.

Truck chesualah Mi pakhat a thi

Inrinni zan khan 909 LPK truck MZ-05 7856 chu Kolasib leh Thingdawl inkarah chesualin, kawng thlangah metre 50 vel a lum a, a khalhtu K Vanlalhruaia s/o K Lalbiakthanga, Kolasib New Diakkawn a thi. Thu dawn danin, LPK truck hian kawng sira ding truck MZ-05 1425 chu táiin, kawng thlangah a tla ta nia hriat a ni a; chetsual lai tak hriat a ni lo a, nimin zing dar 9 vel nia ngaih a ni.

Ruihhlo man

Excise & Narcotics department-a Anti-Narcotics Squad chuan January 30, 2016 zing dar 8:50 khan Rangvamualah ganja gram 564 leh a neitua puh Lalngaihi (44) d/o Kai--
ṭhuama (L), Rangvamual Mangkhawng Veng nia inchhál an man. January 30 zing dar 10:30 khan Hunthar Vengah heroin gram 14 leh a neitua puh Jenet Lalremmawii (20) d/o Lalrampara, Vaivakawn Zohnuai nia inchhal an man bawk.

Phár Pathianni

Mizoram Baptist Kohhran chuan nimin Pathianni khan 'Phár pual Pathianni' an hmang. BCM tualchhung kohhran tinah chawhma inkhawmah phár pualin inkhawm an hmang a, thupui chu ‘Ka duh e, lo thianghlim tawh ang che’ tih a ni. BCM hian kum 2006-a Assembly thurèl angin, January thla Pathianni hnuhnung berah phár pualin hun an hman ṭhin a ni.