Community quarantine centre atana Kohhran hmun hman dan tur sawiho
Lunglei DC V Lalsangliana kaihhruaiin May 21, Ningani khan Lunglei District Task Force on Covid-19 chu Lungleia kohhran hrang hrang hruaitute leh task force-te nen DC conference hall-ah an ṭhukhawm a; kohhran hall-te community quarantine centre-a hman chungchanga inkaihhruaina leh inbuatsaihnate an sawiho.
V Lalsangliana chuan, Lungleia kohhran hrang hrangte'n sorkar ngenna chhánga an kohhran hmunhmate quarantine centre atana hman an phal chu lawmawm a tih thu a sawi a, "Covid-19 hripui léng mek avangin sorkar chuan kohhrante puihna leh ṭawiawmna a mamawh a ni," a ti.
Meeting-ah hian, kohhran hmunhmate sorkarin inkaihhruaina a siam anga inbuatsaihna te, hnathawktu te, ei tur siam te, venhimna lam te, medical leh bawlhhlawh chungchanga an hmalak dante an sawiho a; harsatna an neihte a rang lama sorkar thuneitute hriattir ṭhin ni se, an ti. Community quarantine centre tinah police pakhat zel an duty ang.
Ṭhutkhawmnaah hian Lunglei SP Stephen Lalrinawma, chief medical officer Dr Thani Pachuau, sorkar official dang te, kohhran hrang hrang hruaitute leh task force aiawhte an tel a ni.
Mizoram páwna tangkhang Lunglei district mi haw tur inhriattir mi 960 an awm a; May 21, Ningani zan dar 9:50 khan West Bengal, Assam leh Nagaland aṭanga haw mi 11 (mipa pali leh hmeichhia pasarih)-te'n Lunglei an thleng a ni.
Nimin thleng khan haw rûnpui thawh khatnaa hmarchhak state aṭanga haw Lunglei district mi 125 khung hrante chu khung hran hun a tàwp tawh avang leh an hrisel ṭhat avangin in lama ni 14 inkhung turin chhuahtir an ni a; Lunglei district-ah hian khung hran mek mi 72 an awm.