Chapchar Kût atan cheng nuai 30 dah
Mizoram sorkara Art & Culture department chuan kumina Chapchar Kût hmanna atan cheng nuai 30 an dah a, district hrang hrangah sem darh a ni ang.
Art & Culture department hotute chuan Vanglaini palai zawhna chhangin, nikuma Chapchar Kût hmanna atana district hrang hranga sum sem danah a rual tawk loh bakah, district lamah sum pekin a daih tâwk tawk lo nia an hriat thu an sawi a; sorkarah sum tam zawk an dil avangin kuminah hian budget-ah cheng nuai 30 an rawn pe ta niin an sawi.
Art & Culture department hotute sawi danin, kuminah hian Aizawla Chapchar Kût hmanna atan cheng nuai 22 ruahmanna a ni a, Lungleiah Rs. 2,00,000 dah niin, district dang zawng - Champhai, Kolasib, Mamit, Serchhip, Saiha leh Lawngtlai atan Rs. 1,00,000 ṭheuh dah a ni.
Kum 2015-a Chapchar Kût hman dan thlirletna, March 31, 2015-a chief minister Lal Thanhawla hoa neihah, 'Chapchar Kûta sum hman tur department tinin dah hrang tawh se,' tia rel a ni a; mahse department hrang hrangin sum an dah ta chuang lo a, Planning lamin Art & Culture department-ah Chapchar Kût hmanna tur an dahsak mai niin Art & Culture hotute chuan an sawi.
March 31, 2015-a CM hoa Chapchar Kût thlirletnaah hian venhimna lam tihchak ṭul an tih thu te, Mizote kût ropui ber ngaihhlut nacháng mipuiin an hriat lehzual theih nan inzirtir uar a ṭul thu te, tleirawl zu rûi hmuh tur an tam thu te, western music rock concert a ang mah maha hriat a nih thu te, Kût hlut tâwk lo an tam thu leh kohhran pisa ṭhenkhat an chawlh ve loh thu te, Anthurium Festival-ah sum hman a tam zawk thute sawi chhuah a ni.
Kumina Chapchar Kût hi March 4, 2016-ah hman tura ruahman a ni a, hei hi KṬP General Conference, Champhaia neih hun tur March 3-6, 2016 nen a inrual a ni. Hemi chungchangah hian Art & Culture minister R Romawia chuan Chapchar Kût chu sawn an tum loh thu Vanglaini palai a hrilh.
Art & Culture Minister chuan, KṬP General Conference leh Chapchar Kût inrual ṭhin chu pawi a tih thu sawiin, "Hun lo kal leh zel turah erawh ngaihtuah a
ṭhat a rinawm a, kuminah chuan sawn loh mai ni se kan ti a ni," a ti. Champhai bikah erawh chuan thuneitute'n ruahmanna an siam danglam a nih pawhin, pawi an tih loh thu a sawi bawk.