Lunglei MJA-in Annual Conference hmang

MJA, Lunglei district chuan Inrinni khan Lunglei Press Club-ah Annual Conference an hmang a, kum 2016-18 chhunga hruaitu turte an thlang.

Kum 2016-18 chhunga Lunglei MJA hruaitu turte chu - president-ah Lianchama Chhangte (Zochhiar), vice pre-si-dent-ah Laltlanthanga (Hlimthla) leh treasurer-ah F Lalngaihzuala (JB Cable)-te an thlang. Executive member atan PC Lalduhthlanga (LDF), Lalremruata Zadeng (Zo En), Johan Lalhmunmawia (DDK), V Rokhawlkima (Lunglei Times), Lalduhawma Khiangte (Hlimthla), RP Paudel (Zoram Udaya) leh H Vanlallawma (Ralvengtu) te an thlang bawk.

Lunglei MJA conference hi president K Lalrinpuia'n a kaihruai a, khuallian R Vanrengpuia leh Lungleia IPRO Mina Zoliani ten thu an sawi.

Lunglei MJA conference resolution

1. Khua a ro ṭan leh ta a, kângmei vanga chhiatna leh harsatna a lo thlen loh nan mi tinte tun aṭangin fimkhur ila. Kum tin kan chhehvel kâng ṭhin hi pawi kan ti a, kan ramngaw, luia chengte leh nungchate a suattu ni loa a humhalhtu nih i tum ṭheuh ang u. Hetih rual hian, ram tikângtu leh nungcha túra hrâi chíngte man chhuah an nih chuan dan anga an phu tâwk ang ngeia hrem ni ṭhin rawh se.

2. Kum tin fûr laiin chhim lamah hian power supply hun rei tak a khaihlak fo a, mihringte thunun phâk bak a awm tih erawh kan pawm. Thawktu ṭhenkhat hnaa an inpek em em laiin hmun
ṭhenkhata thawktute avangin power supply-ah harsatna kan tâwk ṭhin niin a lang. Kum dangah chuan harsatna awm tawh lo turin department-a thawktute lo inhmakhua tawh turin kan beiseiin kan phût a ni. Mipuite pawhin power renchem nacháng hria ila, power hrui pawh thing kih leh lo hâlin a tihchhiat thu tun hnuah hriat tur awm tawh lo se kan duh.