Public Information Campaign khâr

Khawlailunga Public Information Campaign (PIC) buatsaih chu a ni thumna atan Inrinni khan chhunzawm leh niin, tlai lamah khâr a ni. A khârna hun hi Serchhip DC Dr Lalrozama'n a hmanpui.

Serchhip DC chuan, nausen thi leh nu, nau chunga thi Serchhip district chhungah an tam ṭhin tih sawiin, "Health department-in zir chiangin theihtawp chhuahin hma an la a, chu chuan rah ṭha chhuahin, kum kal ta chhung khan nu, nau chunga thi an awm loh bakah, nausen thi pawh district dang aia sang ṭhin kha nasa takin a tlahniam a ni," a ti.

Dr Lalrozama chuan, Ser-chhip district hmasawnna atana official-te ṭhahnemngaihna lawmawm a tih thu sawiin, district leh khawtlang tana hna an thawhnaah ṭawiawm turin mipuite a sáwm a ni.

PIC tawp ni-ah hian chaw-hnu lamah sorkar laipuiin thingtlang hmasawnna tura ruahmanna a siam chi hrang hrangte inhrilhfiahna hun leh sawihona hun hman a ni.