Kan ram leh khawtlang siamṭhatna hun hlu Pathianin min pek hi i hmang ṭangkai ang u - Dy. speaker Lalrinawma

Tuikum bialtu MLA Lalrinawma, dy. speaker chuan kan ram leh khawtlang siamṭhatna hun hlu Pathianin a pek chu ṭangkai taka hmang turin an party mite a fuih.

Nimina mithar lawm­luh inkhawm Tlung­vel Vengthar YMA Hall-a buatsaih a hmanpuinaah thu sawiin Lalrinawma chuan, "Democracy-ah chuan ram rawngbawl turin sorkar a pawimawh. Pathianin theih tawpa ke kan pennate malsawmin sorkar fawng vuantu din hmunah kan lo ding ta a, kan ram leh khawtlang siamṭhatna hun hlu Pathianin min pek hi tangkai takin i hmang ang u," a ti.

Lalrinawma chuan MNF party hi party danglam, party dangte ang lo taka Pathian hming lam party an nih thu sawiin, "Kan mi hmasaten 'Pathian leh kan ram tan' tiin' ram tan an nun an lo hlan tawhte kha i hre reng fo ang u," a ti a, 'ṭhenkhatin tawlailirte ringin ṭhenkhatin sakawrte an ring a keini erawh chuan Lalpa kan Pathian hming kan lam zawk ang' tih thuthlung vuan tute an nih thu a sawi.

Pathian leh mipuiten ram rorel turin thuneihna a pek chu mahni inhaivurna atan ni lo, ram leh hnam tan a nih thu sawiin Lalrinawma chuan, "Mi dangte tana inpekna nun neih hi a hlu a, sorkarna hi kan dawnsawn dan a dik phawt chuan kan tum aia rei mipuiin sorkarna min pe dawn a ni. Ram tana hnathawk turin Pathianin hun ṭha min pe tih i hre reng ang u," a ti.