Hyderabad aṭanga lo haw Mizote Naktukah Bairabi thleng dawn

Hyderabad aṭanga Mizo 600 chuang rawn haw mekte chuan naktuk Pathianni hian Bairabi rél chawlhhmun an thlen beisei a ni a, hei vang hian Kolasib DC chuan lo hawte tluang taka an district an thlen theih nan leh Covid-19 vei an awm palh pawha inkai chhâwn a nih loh nan mipui chêt vel dan turah thupek a chhuah.

Kolasib DC thupek ang chuan, Pathianni zing dar 5 aṭanga lo haw tharte phurtu bus Bairabi aṭanga a chhuah hnu darkar khat thleng Bairabi leh Zero Point (Saihapui péng) inkarah mihring leh lirthei kal phal a ni lo. Lo hawte phur turin private motor hmanga inlam leh inhmuah phal a ni lo bawk.

Thupek hian Covid-19 dona atana sorkarin duty tura a ruatte leh phalna pekte a huam lo thung.