Kum tawpa inthlang turin inbuatsaih mek; Inthlan hun tur puan hnaih a nih ring

Election department-te chu kumin kum tawpa MLA inthlan buatsaih turin an inbuatsaih mek zel a, inthlan hun tur puan a nih hnaih tawh an ring.

Election department aṭanga thudawn danin, kumin kum tawpa inthlang tur hi Mizoram bakah state pahnih Rajasthan leh Chhattisgarh an ni. Mizoram leh Rajasthan chu Election Commission of India (ECI)-in an tlawh tawh a, October 6, 2023 hian Chhattisgarh an tlawh ve dawn. Chhattisgarh an tlawh aṭanga rei loteah inthlan hun tur an puan rin a ni.

Dan ang chuan inthlan puan leh inthlan inkarah ni 21 a tla tur a ni a, sorkar chawlh erawh chhiar tel tur a ni lo thung. Tuna Mizoram sorkar term kal mek hi December 18, 2023 hian a tawp dawn a, sorkar term tawp hma-a sorkar thar lakluh hman turin inthlan hi buatsaih a ni ṭhin. MNF kaihhruai sorkar hi December 15, 2018 khan lakluh a ni.

ECI kalphung angin Mizoram MLA inthlan hnuhnung ber kum 2018-a inthlan hun November 28-a inthlang tur angin an inbuatsaih mek. November 28 hi inthlan leh hun tur tihna ni loin, inthlan hun puan a nih hma chuan ECI chuan inthlan hnuhnung ber huna inthlang tur anga inbuatsaih phawt turin state-te a ti ṭhin a ni.

Kum tàwp lama inthlang turin ngawrh taka an inbuatsaih mek thu sawiin Election dept. hotute chuan, "Ruahmanna hrang hrang ECI norms angin kan kalpui zel. Inthlang tura inbuatsaihna kawngah harsatna em em kan nei lo. Ṭha taka inthlanna kalpui turin kan inbuatsaih mek," an ti.

Election department hotute chuan, kumin MLA inthlan turah state páwnah polling station buatsaih a ngaih tawh dawn loh thu sawiin, "Tun hma kha chuan Mizoram electoral roll-a chuang Bru mi ṭhenkhatte kha Tripura-a camp-a awm an ni a, chuvangin, camp-ah vote an thlak theihna tur buatsaih a ngai ṭhin," an ti a, tunah chuan camp-a awmte hi Mizoram electoral roll aṭangin paih (delete) vek an nih tawh thu an sawi.

Kum 2018 MLA inthlan hun tur kha October 6, 2023 -ah puan a ni a, November 28-ah inthlangin, December 11-ah vote chhiar a ni.