Vanapa Hall-ah Mim Kût hman a ni

Mitthite puala Mizote kût neih chhun - Mim Kût chu nimin khan sorkar bultuma a ṭum khatna atan Vanapa Hall-ah hman a ni a; Social Welfare & Tribal Affairs minister Lalrinawma, Mim Kût State Level Steering Committee chairman ni bawk chu khuallian a ni.

Mim Kût hi sorkar laipui Ministry of Tribal Affairs aṭanga hmun cheng nuai 20 senga Social Welfare & Tribal Affairs department buatsaih a ni a; khuallian chuan, hmangaih kaltate puala remchang taka hun buatsaih chu tih ṭhanah neih zel a beisei thu a sawi a, "Hmarchhak state hrang hranga hnam hrang hrangte hi pawn lam mite tan en mai chuan hmel inang tak tak, hriat hran har tak kan ni thei a, kan hranna pholangtu langsar tak chu kan hnam ziarang leh tih phung kan neihte hi a ni," a ti.

Kût hmannaah hian SWTA director Dr Lalhriatzuali Ralte, Art & Culture deputy director Lalchuailova, Mizoram Kohhran Hruaitute Committee vice chairman Rev. Lalrintluanga leh Central YMA president R Lalngheta-te pawhin thu an sawi a; hla chham, zai leh lâmte entira ngaihthlak a ni.