KHAWTHLIR

Thisen pe

Johnson College NSS & Red Ribbon Club ṭangkawp chuan nimin khan an College Multipurpose Gymnasium-ah National Voluntary Blood Donation Day (October 1) denchhenin Voluntary Blood Donation Camp an buatsaih a; Civil Hospital Aizawl Blood Bank tan thisen unit 56 an pe. Thisen petute hi mipa 49 leh hmeichhia 7 an ni.

SHG Exhibition

Mizoram State Rural Livelihoods Mission (MSRLM), Angel Business Promoters leh NABARD ṭangkawp chuan nimin khan Kolasib Venglai bazar-ah SHG Exhibition an buatsaih a, Bilkhawthlir leh Thingdawl RD Block aṭangin SHG 16 an tel. Wheat beer, handmade soap, handloom & handicraft, kuhva kau aṭanga thilsiam, cake leh thlai bakah, thil hrang hrang zawrh a ni a; vawiinah chhunzawma zawh a ni ang.

Zirlaite zirtir

Zirtiri Residential Science College chuan nimin khan an college hall-ah zirlaite pualin Intellectual Property Rights leh Hands on Training on Frist Aids Awareness Programme an buatsaih a; 3rd leh 5th semester zirlaite hnenah MISTIC project scientist-I GC Lalremruata'n Intellectual Property Rights chungchang a hrilhfiah a, Dr Abraham Lalhruaitluanga Khiangte-in 1st semester zirlaite hnenah 'hands on traning on first aid' thupui a sawifiah bawk.

ZPM inkhawm

ZPM chuan nimin khan an pisa-ah chhung inkhawm an hmang a, thusawitu ZPM gen. secretary Laṭhazuala Rawite chuan, "ZPM a lo din khan inkaihhruaina fel thlip thlep tak kan nei lo chungin kan hotute'n ruahmanna an siam angin kan kal chho ve bek bek a, tunah chuan inkaihhruaina mumal tak neiin Dan bu (constitution) te hial kan lo nei chho ta. La famkim tâwk lo hle mah se, kan mamawh khawp chu a awm a ni," a ti.