Sorkar hna a nghet loa thawkte'n an beiseite tihhlawhtlin an ngen

Provisional Employees Association of Mizoram (PEAM) hruaitute chuan nimin khan Aizawl Press Club-ah thuthar thehdarhtute an kawm a; Mizoram sorkarin an hamṭhatna tura hma a laknaah an lawm thu an sawi rualin, a hlawhtlinna hmuh hun an nghahhlelh tawh thu an sawi.

PEAM hruaitute chuan, provisional employees (PE)-te hi Group 'C' leh 'D' hnaa a nghet loa sorkarin a rawihte an nih thu leh an mahni enkawltu department leh sorkarin an dinhmun a siamṭhat sak zel chu an lawm thu an sawi a, "Kan hamṭhatna tur pawh a la ngaihtuah zel dawn niin kan hria a, kan lawm hle," an ti.

September 27, 2023-a Council of Minister ṭhu­khawmin 'One Time Relaxation for Regulariza-tion of Contract & Provi-sional Employee Outside the Prescribed Quota' an ngaihtuahnaa a thuphunga an pawm chu an lawm thu sawiin PEAM hruaitute chuan, "A taka kan hman thuai theih nana hma min lak zui sak turin sorkar leh a concerned department- te kan ngen nghal a ni," an ti a; kum 2020 aṭanga tun thlengin contract employee mi 290, provisional employee/MR mi 1,687 leh work­charged mi 36 dahngheh an nih tawh thu an sawi.

PEAM hruaitute chuan, tunah hian higher secondary school-ah a nghet lo (contract) a thawk mi 26 an awm mek thu an sawi a, "Provincialised tur pualin sikul 180 lai Council of Minister-in a pawm avang hian state sorkar sum hman ral tur a tam dawn hle. Keini state sorkar hnuaia thawk sa la nghet lote regularized-na tur ngaihtuah leh pawm hmasa loa provincilized school hnuaia thawk, sorkar hnuaia hna la thawk ve ngai reng reng lote sorkarin a hnuaia lakluh a ti a nih chuan kan pawm dawn lo tawp a ni," an ti.

Kum sarih thawk pumhlum tawh, DPAR-in regularized tura list a siam fel tawh chu paih ṭhen awm loa kumin MLA inthlanpui hma ngeia regularized turin sorkar an ngen a, "DPAR-in regularized tura list a siamah a tirah chuan PE-te mi 1,600 vel aṭangin mi 552-ah an ti hniam a, contract hna thawk mi 100 vel aṭangin 57-ah an ti hniam tawh. Tuna list awm mek hi paih ṭhen awm tawh loa reguralized hi kan thu tawp leh kan dinna a ni, " an ti a; PEAM-ah hian member 9,780 vel an awm mek thu leh sorkarin an duh angte a tih hlawhtlin sak loh chuan a nuar zawnga hmalak hun a la thlen theih thu an sawi.