Hun harsa tawn laia sorkarna chelha paltlang tura Pathian dah kan ni - MNF President

Mamit East Block MNF chuan nimin khan Lengpui Community Hall-ah khawmpui an hmang a, an hun hmanpuitu MNF president Zoramthanga, chief minister chuan MNF chu hun harsa-a sorkarna chelha, paltlang tura dah an nih thu a sawi.

Zoramthanga chuan Mizoramin hun harsa a tawh hrang hrang - Covid, lirnghing, ram kâng, ramri buai, vawkpul hri leng, Myanmar, Bangladesh leh Manipur raltlan lo awm turte hretu chunglamin MNF chu sorkarna a pek thu sawiin, "Heng harsatna hrang hrang kan tawh lai hian budget dawn kim lo vaibelchhe têl, kan unau raltlan singnga chuang enkawl chunga chaw nghei lo leh development heti zat kan la nei thei hi chunglam kaihhruaina kan chan a ni. Hun harsa kan tawn laia sorkarna chelha, paltlang turin Pathianin min dah," a ti.

MNF chu sipai râl a ni emaw, underground râl a ni emaw overground râl a ni emaw do chhuak vek tura din an nih thu sawiin MNF President chuan, "Tunah hian MNF hi kum 62 a ni tawh a, vawi khatmah pawl dangah kan la inlet lo. Thuthlung neia kal kan ni a; kan hnam, kan sakhua, culture leh tihphung vawnghima venghim tura ding kan ni," a ti a, Myanmar aṭanga Zo hnahthlak rawn raltlante biometric hmanga zirchian ni rawhse tia sorkar laipuiin an rawt pawh an duh loh thu leh an tih dawn loh thu huai takin an hrilh ngam thu a sawi.

MNF President chuan Pathian leh mipui zarah MNF-in sorkarna a chang leh ngei dawn tih sawiin, "Congress chu tun dinhmunah artelukawn thei an ni. ZPM-in tlin lohna tur chiangsa bial 10 an nei. Bial 30 aṭanga sorkarna siam hi an tan tihngaihna a awm lo. An ṭhatna ber nia lang Aizawlah pawh an boruak a hniam sâwt hle a, an hawipir ngam tawh lo reng reng a ni," a ti.

Kalphung thar aupuituten 'sorkarna siam tawhte khan engmah min thlen lo' tiin a chhe hlàwm vekah an puh nia sawiin Zoramthanga chuan, "An insawi duhawm chawp a, party hi eirukna bul a ni a, party kan duh lo 'movement' kan ni an ti. 'Kan innghahna chu kohhran a ni, kohhran in min support, unit din a ngai lo' an ti. Tunah erawh chuan party-ah an inziaklut a, unit an din leh ta," a ti a, an nih duh leh an din duh loh zawng zawng an duh vek tawh niin a sawi.

Thusawitu dang, MNF adviser H Lalzirliana, MLA chuan sorkarin harsatna a tawh zozaite a tam lutuk nia sawiin, "Chhiat rawih theihna khawp harsatna an ni. Mahse, kan sorkar enkawltu Chief Minister hi Pathianin a hruaia, Mizo rilrupu, mi tumruh, mi huaisen a nih vangin tun thlengin mipuiten mamawh kan la nghei lo a nih hi," a ti a, hmasawnna lian tham chi hrang hrang Mamit bialah ngawt pawh thawh a nih thu a sawi.

Mamit East Block MNF khawmpui hi an president Lalropuia'n a kaihruai a; an party thuchhuah tarlan danin MNF President hian an party-ah mi 262 a lawmlut.