Minister-in thil chi thum a hawng

South Tuipui bialtu MLA Dr R Lalthangliana, minister chuan September 28, Ningani khan a bial South Tuipui chhunga Darzo khuaah solar pumping scheme leh nimin khan Hnahthial Electric Vengah district research office (DRO) leh staff quarter thar a hawng.

Dr R Lalthangliana chuan, ramngaw ti cheureu loa tui pump khawl ṭha tak Darzo khuain an nei chu ropui a tih thu a sawi a, "SELCO company nen kan in dawrna hlawhtlinna zarah Mizorama PHC-te chu nizung chakna hmangin tih ên a ni dawn," a ti a; Darzo khua tan Ṭiau balu lakna tur kawng ruahman a nih thu a sawi.

Hnahthial DRO pisa leh staff quarters a hawnnah Minister chuan, "Hnahthialah District Institute of Education & Training (DIET) te, Rawpui-ah Kendriya Vidyalaya Sangathan(KVS), zirlai naupangte'n a thlawn veka lehkha an zirna hmun tur ruahman a ni a, District Hospital sakna tur approval hmuh tawh niin, Circuit House pawh sak thuai a ni dawn," a ti a, District Transport Office leh District Local Administration Office pawh hawn thuai a nih theih nan hmalak mek a nih thu a sawi bawk.

Darzo Solar Pump Scheme hi JJM hnuaiah Rs 421,36,000 senga siam a ni a, ni tin tui litre 1,44,000 pump chhuak thei tura ruahman a ni.

Hnahthial District Research Office leh staff quarter building hi cheng nuai 43 senga sak a ni.