1st IR Bn. Company Advance Hqrs. hawng

Home minister Lalchamliana chuan nimin khan Vairengteah 1st India Reserve (IR) Battalion Company Advance Headquarters thar a hawng a; police quarters indaih lohna tiziaawm turin SASCI hnuaiah khawpui chhunga police quarters sak nan cheng nuai 5,000 hmuh a nih thu a sawi.

Lalchamliana chuan, sipai 100 vel awmna tur IR Company Advance Headquarters dah thar chuan ramri hnaih, a bikin Vairengte chhehvela chengte tan thlamuanna leh ngaih ngamna a thlen ngei a beisei thu a sawi a, "Ramri buai hi chin fel mai a harsa nachungin, sorkarin ram leh hnam tan theihtawpin hma a la reng. Sum harsatna karah uniform, silai leh an mamawh hrang hrangah police-te a ṭha thei ang bera thuam tura hmalakna leh hlawhtlinna hmuh theiha a awm hi a lawmawm a, police quarters indaih lohna tiziaawm turin SASCI hnuaiah khawpui huam chhunga police quarters sakna tur cheng nuai 5,000 hmuh a ni," a ti a; police-te hamṭhatna turin sorkarin theihtawp a chhuah zel dawn tih a sawi.

Bialtu MLA Lalrinsanga Ralte chuan Chief Minister leh Home Minister-te kaihhruaina hnuaiah ramri chungchangah hmasawnna tam tak a awm thu a sawi a, "Ramri buaina boruaka sorkar hmalaknaah bial mipui aiawhin lawmthu ka a sawi a. Ramri venhim kawnga a pawimawhzia hriaa sorkarin Vairengtea IR Company Advance Headquarters changtlung tak a dah hi kan lawm hle a ni, " a ti a, khawtlang mipuite chu ṭha taka police-te thawhpui turin a chah.

Vairengtea 1st IR Bn. Company Advance Headquarters hi cheng nuai 223.71 senga din a ni a; sipai 30 awm theihna barrack pathum, sipai 10 awm theihna barrack steel structure (hun sawn theih) 10, NCO/JCO barrack cum arm kote square metre 285-a zau, type-III quarters pahnih, choka leh chaw eina pindan sqm 48-a zau, latrine block pathum leh sentry post pahnih a awm a ni.