Mipuiin kawlphetha an hnianghnar theih nan Sorkar chuan kawng hrang hrangin ṭan a la - Power Minister

Power & Electricity minister R Lalzirliana chuan nimin khan Thenzawla Solar Power plant siamna hmun tur leh Thingsulthliaha 132/33kV Sub-station bunna hmun turte a tlawh a; mipuiin kawlphetha an hnianghnar theih nan sorkarin kawng hrang hrangin ṭan a la tih a sawi.

R Lalzirliana chuan, Thenzawl Solar Power Plant aṭanga kawlphetha siam chhuah chu Mizoram ta tur a nih thu a sawi a, "Kawlphetha hi mi tin mamawh, a loa awm theih loh a nih avangin power supply hnianghnar neih hi kan mamawh em em a, sorkar chuan kawng hrang hranga ṭan lain Thenzawl bakah, Sumsuih ramah MWp 5 Solar Plant thar bun tura ruahman mek a ni," a ti a, solar plant siam hna thawktu tur contractor pawh thlan fel a nih tawh thu a sawi.

Thenzawl Solar Power plant hi Phivawk tlang bigha 30 vela zauah bun tur a ni a, NABARD loan cheng nuai 7,482 senga siam tur a ni. Kum hnih chhunga thawh zawh tur niin, kawlphetha MWp 10 MWp pe chhuak thei tura ruahman a ni. A panna kawng laih leh 132 kV sub station bun hna hi P&E department-in an thawk dawn.

Thingsulthliaha 132/33kV sub station tur hi Special Assistance hnuaiah cheng nuai 300 hmanga thawh tur a ni a, fund allocation hmuh tawh niin expenditure sanction dil mek a ni. He sub station-ah hian Aizawl - Lunglei 132kV line awmsa hmangin Thingsulthliah khaw bulah power lak luh a ni anga, 33kV level-in chhim leh hmarah power pek chhuah a ni ang. Hna hi thawh ṭan tawh niin, sub station levelling hna thawh zawh tawh a ni.