Lei theiha min ngaitute hi Mizo mipuiin kan mamawh lo - MPCC President

Dampa West Block Congress chuan nimin khan special joint meet leh mithar lawmluh inkhawm New West Phaileng Dintharah an buatsaih a, an hun hmanpuitu MPCC president Lalsawta chuan, lei theiha ngaitute Mizo mipuiin an mamawh lo tih a sawi.

Lalsawta chuan, Mizoram mipui lei theih an ni chu pawi a tih thu sawiin, "Lei theih i ni lo ang u. Kohhran mite, Mizoram hmangaihtute hi mihring lei theih kan ni hi kan rilru a na a ni. Vawiinah hian lei theiha min ngaitute hi Mizoram mipuite hian kan mamawh lo. Thluaka sum lut, sum siamna ringawt ngaihtuahtute hi tun inthlanah hian i hnawl ngam ang u," a ti.

India ram leh Mizoramin tun anga hun thim leh khirh a hmachhawn hun hi a la awm ngai lo nia sawiin MPCC President chuan, "BJP sorkar paih thei, INDIA hi chak ngei tura rin an ni," a ti a, BJP thawhpui thei mai MNF hnawl an ṭul takzet thu a sawi.

Lalsawta chuan regional party MNF leh ZPM chu central lama zawmpui nei lo an nih avangin BJP tana thawhpui remchang an ni reng tih sawiin, "MNF leh BJP an thawkho ang tho hian ZPM pawh hian BJP hi an thawhpui leh ka ring a ni," a ti.

MPCC President sawi danin an manifesto 'Ṭang Puihna' chu mi tin tan a ni. Dinchhuah tuma ṭang, a duh apiang tan Congress Party chuan training a buatsaih dawn.

He hun hi Dampa West Block Congress Committee president J Lalnunsanga'n kaihruaiin, Dampa biala Congress Party candidate Lalhmingthanga Sailo pawhin thu a sawi.

An party thuchhuah chuan MPCC President hian an party-ah mi 78 a lawmlut niin a tarlang.