Sorkar sikula hlankai an nihnaah MIGASTU an lawm

Mizoram Govt. Ad Hoc Aided School Teachers' Union (MIGASTU) chuan thuchhuah siamin, tunhnaia Council of Ministers ṭhukhawmin Ad hoc Aided School-te sorkar sikul (provincialised status)-ah a hlangkai avanga an lawm thu an sawi a; "Sorkar sikul hi vantlang mipuite tan malsawmna a nihzia leh zirna siamṭhatna hmun pawimawh a nihzia lantir turin theihtawpin ṭan lak deuh deuh kan tum dawn," an ti.

MIGASTU chuan, sorkar hruaitu te, Education Minister, Secretary, Director leh department-te'n hma an laksaknaah an lawm thu an sawi a, "Pu Zoramthanga kaihhruai sorkar hian zirna hi ram leh hnam hmasawnna rahbi pawimawh ber pakhat a nihzia hre chunga sum harsa tak chunga kan thiamna leh theihnate khawtlang tana phûr taka kan hman chhoh zel theihna tura vantlang enkawl sikulte min upgrade ṭhin hi kan va chhuang ṭhin tak em," an ti a; tun dinhmun thlenpui ve hman lo an thawhpui chawl tawh leh thi tate an tawrhpui thu an sawi bawk.