Land lease leh NGO-te hmunhma chhiah Tihhniam vangin cheng nuai 400 hloh ring

Land Revenue & Settlement (LRS) department chuan chhiah an hmuhna, land lease, biak-in, zirna in, hnuchham in (orphanage home), thlanmual, community hall leh khelmual aṭanga chhiah lâk zat tur an tihhniam avangin kum kal mek 2015-16 chhungin cheng nuai 400 vel an hloh phah dawn niin an sawi. Stamp & Registration-a hmuh tur zat erawh an khûm hle dawn thung.

LRS department hian tunlai hian chhiah chi hrang hrang leiman, Zoram chhiah leh AMC huam chin páwn lamah building tax a khawn mek a; sorkar kum kal lai 2015-16 chhungin chhiah hrang hrang aṭangin cheng nuai 706.15 vel an beisei. Land lease bik
aṭanga chhiah an hmuh chu nasa taka tihhniam a nih avangin January 2016 tàwp lam thleng khan 20% vel chiah an la hmu a ni.

Revenue department hotute sawi danin, kum 2005-a sorkarin dân a siamah chuan, biak-in, zirna in (school, etc.), hnuchham in, thlanmual, community hall leh khelmualte chu chhiah âwltirna tur a awm a, chhiah lak a ni ngai lo.

January 6, 2013-ah 'The Mizoram Land Revenue Laws' hman ṭan a ni a, chutah chuan biak-in leh vangtlang hmunah chhiah âwltirna tur a awm tawh loh avangin chhiah lak vek tum a ni. Mahse, vangtlang hmuna chhiah lâk tum chu mipui leh political party aṭanga sawiselna thâwm a nasat avangin sorkar chuan land lease leh vangtlang hmun aṭanga chhiah a lak chu a tihniam leh ta a ni.

Sorkar kum kal meka Finance department-in Non-Tax Revenue aṭanga hmuh beisei zat an bituk chu cheng nuai 212 a ni a; chu chu LSC khulna te, LSC neiin hming an thlakna man te, lehkha pawimawh khul chhuahnate leh bank-a LSC dahkhamna (mortgage)
aṭanga sum hmuhte a ni.

January 2016 tawp lam thleng khan Non Tax Revenue bikah cheng nuai 117.57 an hmu tawh a, an la hmuh leh tur chu nuai 95 vel a ni a, Finance-in an tuk zat hi LRS department chuan hmuh tlin an inbeisei.

Tax Revenue bikah chuan cheng nuai 706.15 hmu tura beisei an nih laiin, tun dinhmunah nuai 212.24 chiah an la hmu a, cheng nuai 400 vel hmuh theih an inbeisei. Land lease leh vangtlang hmun pawimawha chhiah lak zat tihhniam a nih avang hian Tax Revenue-a target hi an tlin dawn loah an ngai. Land lease leh vangtlang hmun pawimawha chhiah lak tihhniam bakah, AMC-in an huam chhungah Property Tax an khawn ve tâk avangin cheng nuai 100 vel an chân phah niin an sawi.

Finance department chuan Stamp & Registration aṭangin Rs. 4,90,000 hmu turin an tuk a, December 2015 thleng khan Registration aṭangin nuai 207.26 leh Stamp bikah Rs. 60,000 chuang hmu tawhin, target chu an khum tam hle tawh. Registration-ah hian 2015-16 chhungin cheng nuai 250 hmuh phak an inbeisei a ni.