Chief minister hoin Covid-19 kaihhnawih rel Hall-ah mitthi vui zel tawh tur Lockdown chungchang rel tel lo
Nimina chief minister Zoramthanga hoa Health minister Dr R Lalthangliana, chief secretary Lalnunmawia Chuaungo, officials, Indian Medical Association, Mizoram Kohhran Hruaitu Committee leh NGO hruaitute ṭhukhawm chuan social distancing mipuiin an zawm theihna atan mitthi hall-a vui ni se, an ti. Meeting-ah agenda-ah total lockdown chungchang a tel lo.
Chief Minister chuan kan him tlan zawk nan mipui kan zavaiin fimkhur nachang kan hriat thar a pawimawh tih sawiin, "Nasa taka he hri hi ṭaidarh hluai thei kan ni tih hre reng chungin fimkhur takin kan awm tlan a ṭul. Fimkhur kan hmasak chuan kan vaia kan himna tur a ni. Testing ngawrh leh zawka tih zui zel pawimawh a, Rapid Antigen Test kits lei belh a ni ang," a ti.
Meeting-a rel a nih dan chuan sorkarin inkaihhruaina dinglai angin mitthi vui inkhawmah mi 50 aia tam kalkhawm loh a, social distancing ṭha taka kalpui anih theih nan kohhran hall emaw, YMA hall emaw, hall dang remchangah mitthi vuina neih ṭhin tur a ni. A kalte hming, veng leh biakpawhna tur mobile phone number ziahna tur chhawp a ni ang. Chhiatni ṭhatni (mitthi vui, inneih, lungphun leh punkhawmna thil dangah) social distancing khauh taka kalpui a, sorkarin inkaihhruaina a siam ang zela hmalak a ṭul thu meeting-ah hian sawilan niin, "Mi tam tak an pungkhawm ṭhin chu a veiawm hle. Kalkhawm zingah positive pakhat lo awm ta se, contact tracing tih zui a harsat theih dawn a ni," an ti.
Pungkhawm an tlem zawk theih nan association emaw, eng pawl emaw an member thi an lo awm a nih pawhin pawl emaw hnathawhpuite aiawhin mi pahnih aia tam lo intirh ni se, chhungkhat lainaah pawh a tlem thei ang ber an kal a tur a ni, tih a ni. Zaikhawm chu Covid-19 hrik thehdarhna remchang tak a nih avangin mitthi vuinaah zai loh turin thutlukna an siam.
Meeting-ah community spread a awm thulha inenkawlna hmun tur indaih lohna awm thei chungchang pawh sawilan niin, kohhran hruaitute hmunhma a ṭul chuan hman a ngaih thu sawi a ni bawk. Chief Minister hoa meeting hian lockdown chungchang an rel an rin avangin mi tam tak an phili buaiin ei turte an lei lawk a; meeting agenda-ah lockdown chungchang a tel loa, a thuphung chuan meeting-ah hian sawi lan a ni tih Vanglaini chuan thu a dawng.