KHAWTHLIR

Lunglei DC thar

Lunglei DC thar Abhijit Vijay Chaudhuri, IAS chuan nimin khan a hna thar a zawm a, DC office thawktute kâwm nghalin, fuihna thu a sawi. Abhijit Vijay Chaudhuri hi IAS (AGMUT Cadre) 2012 batch a ni a, October 2014 aṭanga January 2016 thleng khan North Vanlaiphai SDO(C) hna a chelh a ni.

Motor chesualah thi

January 31, 2016 tlai dar 4 vel khan Lalhmingchhuangi, Lawngtlai Bazar motor (Bolero) MZ-07 2663 chu Lawngtlai district-a Lower Saikah bulah chesualin, ft. 30 vel a lum a; a hmunah motor-a chuang ve Bronson-a (3) s/o Roluahpuia, Lawngtlai Bazar Veng a thi. Motor hi Malsawmzuala'n a khalh a, mi pali an chuang a ni.

In kâng

Champhai district-a Mimbung khuaah January 29, 2016 chhun khan Ginṭhuama in, Assam type a kàng a, bungrua chuh hman lohin a kâng ral. Mimbung khawtlang chuan Inrinni khan in sak ṭhat hnatlang an nei a, bialtu MLA H Rohluna'n sorkar
aṭangin rangva a ngaihtuahsak a ni.

Mi thattu dem

Chawngte 'L' Branch YMA chuan thuchhuah siamin, January 28, 2016-a Chawngte-a Supply department storekeeper HK Vanlaltlana, a ina thah a ni chu an dem thu an tarlang a, a chhungte sorkarin chhawmdawlna pe se an duh thu an sawi. A thattua puh Lalnunzauva chu a na thei ang bera hrem an duh bakah, Chawngte khuaa a awm zui zel an remti tawh lo.

Inkâp hlum

January 31, 2016 zan dar 10 vel khan West Lungdar khuaah Lalrindika (25) s/o Lalchhunga chuan Vanlalhruaia (35) s/o Lalkailiana chu ulhbunin a kâp hlum. Thu dawn danin, Lalrindika leh Vanlalhruaia te hi pate unau an ni a, Lalrindika te inah an inhnial buai a, Lalrindika chuan a kâp ta mai a ni. Lalrindika hi police-in an man nghal.

Heroin man

Central YMA hnuaia SRS duty-te chuan January 29, 2016 tlai khan Tuirial Airfield-ah heroin gram 8.47 an man a, a neitua puh Rokunga, Tuirial Airfield Veng nia insawi pawh manin, thubuai an siamsak.

Pawisa lem man

Champhai police-te chuan January 30 khan Tualsiankhup s/o Langkhando, Tuisenphai, Myanmar hnen aṭangin pawisa lem cheng 500 note 10 an man.

Hall hawng

NEEPCO Ltd.-in corporate social responsibility aṭanga Sakawrdaia community hall an sak chu January 30, 2016 khan bialtu MLA RL Pianmawia'n a hawng. Hall hi cheng nuai 43 sênga sak a ni a, a dung ft. 93 leh a vang ft. 46 a ni.

Zu leihbua

Lai Women Association, Sangau-4 Branch-te chuan January 28, 2016 zana sap zu an mante chu January 30, 2016 zing khan an leihbua. Zu an mante hi tualchhung state-in Rs. 17,000 hu a ni a, an leihbuaknaah hian Sangau khawtlang hruaitute an tel a ni.